Mizoram, Lunglei khuachung ralzaam camp ah a ummi sianginn nih cacawnnak thilrii pawl an herh
The Chinland Post | 2022 June 20 – India, Mizoram, Lunglei khuachung a phanmi ralzaam hngakchia hna caah awnpiakmi sianginn ah cacawnnak thilrii pawl herh tuk a si.
Lunglei ah a ummi Ṭhaizawl ralzaam camp chungah biakinn he tlai in an awnmi sianginn ah CDM siangcachim 5 hruainak in KG in Grade-7 tiang hngakchia 100 leng ca an cawng kho tiah theih a si.
“Lunglei khua a rak phanmi hi Matupi lei in an tam. Ṭhaizawl ralzaam camp ah ralzaam 600 leng an um. Adang hmunhma pawl aa tel rih lo. Cucaah hngakchia pawl an fimcawnnak caah tiin sakhaan chungah a ummi biakinn he tlai in a tlamtlinnak in cachimh a si. An umnak in an himnak hnga a rannak in rak tlik a si caah zeihmanh an i put manh lo. Cachim tikah, Textbook, cawcawnnak thilrii, cauk pawl an herh tuk” tiah Lunglei khua ralzaam pakhat nih Mizzima ah a chim.
Ṭhaizawl ralzaam camp sianginn te hi bawmhnak zeihmanh lo tein mah tein tawlrel a si tiah a chim.
Fur caan a si caah raifanh, chungtlik sii le a dang sii, eidin, facang, chiti, aalu lengah fikfa a tam caah khiangthawng an herh tiah theih a si.
Matupi peng chung ah a ummi Kase, Tibaw, Ngalai, Khuangan, Kelung telh in khua 30 leng in mipi 4,000 deng Mizoram chungah i dor a si.
About The Author
