Mizoram Thimnak Ruang Ah Ramri Gate Viate An Phih
Salai Elvis| 2018 November 29| India ram nichuah lei Mizoram thimnak cu November 28 ni ah an tuah caah ramri luhchuahnak (gate) vialte an khar dih tiah kan theih.
Thimnak chungah ramleng mi phungning lo lutsual in buaibainak a chuak sual lai ti phan ah a tubantuk in an phih hi a si tiah The Aizawl Post nih a tial.
Hi kong he pehtlai in Falam peng Rihkhawdar khua No. (1) khuabawi Pu Chan Liana nih, “India-Myanmar ramri No.(2) luhchuahnak kutka cu a luancia 25 ni an khar cang. Hlei zong India lei kap in an khar dih caah minung le thilri vialte an taap dih. Thimnak kong he pehtlai in humhimnak caah an kharmi a si. Thimnak an dih thazing in cun an hun lai ti kan theih” tiah a chim.
Atu bantuk in pehtlaihnak kutka an khar pin thilri phurh khawh a si lo tikah khualtlawng sawhsawh hna tu cu hngalhthiamnak in gate vampang in an lutchuak kho tiah Zokhawthar khuami Pu Lallawmpuia nih a chim.
Tukum Mizoram thimnak chungah palai 209 an i cuh. Hi chungah tangnga tiang lawng a phan mi palai 6 le tangriat tiang a phan mi palai 15, tanghra tiang a phanmi palai 16, tanghleihnih tiang a phan mi palai 23, Post Graduate 37, Graduate Professional 21 le Doctorate 14 an um tiah Association for Democratic Reforms hlathlainak an tuah ningin kan theih.
Hi aa zawmcawh mi palai hna chungah Criminal case (ahmuh) a ngeimi 9 an um i mah chungah thazaang a thawng ngaimi MNF party Chiarman Pu Zo Ram Thanga le Congress Party Chiarman Pu Lalthanhawla zong an i tel. Mizapi ai-awh in aa zuamcawh mi chungah Criminal case a ngei mi pakhat le BJP party chungin minung 2 an um tiah kan theih.
Ref: Khonumthung
About The Author
