May 20, 2024

Na Dawtmi He Nan I ‘Date’ Hmasat Bik Lio Ah Na Hal Lo Ding Bia Phun 7

0

The Chinland Post| 2018 March 13| ‘Date’ timi cu a sullam naa fiang cang men ko lai. Na dawtmi na ngaknu, na tlangval he nan i duh thawk in a voi khatnak bik hmun khatkhat ah nanmah pahnih te lawng nan lenti i, na va i ton khi miring nih ‘Date’ an ti, Kawl nih cun ‘ching’ an timi khi a si. A voi khatnak nan i ton a si caah nan sining zeimawzat nan i chim lai, nan i hal lai. Mah lio caan i biahal naa palh sual ahcun a pingpalo a chuak kho, caan rau lo teah i then khawh a si. Cucaah a tanglei bantuk khin biahal lo dingmi ralrin ah a tha.

1. A hlan a darling kong
Na dawtmi kha a hlan ah darling dang a rak nge-imi a si ahcun a hlan i a darling kong kha hal bak rih hlah. Hodah si, khoidah um, nan i pehtlai ti maw, keimah nak in aa dawh deuh maw tiban-tuk khi hal bak lo ding. Mahti na hal ahcun a lung hna na lenter diam men ko lai. Siloah a hlan i a darling he lungfak ngai i a rak i thenmi hna an si ahcun a hmai a chia colh khomi a si.

2. A kum zat, a lahkhah
A voi khatnak nan i ton a si ko caah a kum kha theih naa zuam colh a hau lem lo. Duhsah in na theih te ko lai. Cun riantuanmi a si zong ah a lahkhah eizat kha hal bak hlah, zei miphun hmanh nih lahkhah hal hi an rem lomi a si. A caan a phanh tik ah bia le lam tiah a chuak lai i an chimh te ko lai. Khi bantuk phun biahalnak nih dawtnak ah lunghrinhnak a chuahter khawh.

Young couple in love outdoor

3. Na lung ka tling maw?
Online in aa uar i aa tong hmasami zong nan si kho men. A leng ah aa hmu bal cangmi zong nan si kho men. Zeiti a va si zong ah nan i duhnak nan i fian cang ko caah na lung ka tling maw tiah va hal than kha a hau lo. Hi bantuk biahal-nak hi a leh dan thiam zong a har i, tampi chim awk zong a tha lomi a si.

4. I thit-umh ding kong
I thit-umhnak kong hi cu i duhnak caan saupi a si hnu lawng ah khin a tlaangpi in chim le i hal a si tawn. Na dawtmi kha zeitluk in na duh ko zong ah a voi khatnak nan i ton ahcun mah kha
kong kha na chimh colh ding a si lo. Amah lei kap in timhlamhnak a rak ngeih pah ve lo lebang ahcun a lau lai i, nan bia zong a tluang kho ti lai lo.

5. A hlan ah naa date bal cang maw?
A hlan ah darling a ngei cangmi a si le silo na thei lo kho men. A va ngeih bal pek, ngeih bal lo pek ah ‘atu bantuk hin cu hlan ah date na tong bal cang maw?’ ti bantuk khi hal citcet lo ding. Hi bantuk biahalnak cu mi va neek khi a lawh hlei ah hal a herh lomi phun khat a si. Neeknak bia a lomi phun hrimhrim na hrial ah a tha.

6. Nulepa rian tlaihmi kong
A voi khatnak bik i tonnak ahcun “na nu le na pa zei rian dah an tuan” ti bantuk zong khi dengteo in hal phung a si lo. “Nan chungkhar kong rak ka chim” ti lei hna khin hal law, amah tein cu bantuk kong cu a chuak ko lai. A nu-lepa rian tlaihmi dengteo na hal colh ahcun tangka a duhmi ngaknu siloah tlangval ah an ruah khawhmi a si.

7. A thi cangmi kong
An inn chungkhar kong na hal tik ah khin a nu siloah a pa hna kha a thi cangmi an rak si kho. Cun aa then cangmi hna an si kho. Cu bantuk a si ahcun a bia na tan lai i, “aw si maw, sorry tuk mu” na ti lai. Amah nih “a poi lo” a ti i, a peh thluahmah lo ahcun a thi cangmi kong ah “zeitik dah thih, zeitin dah thih” tibantuk pawl na hal lai lo.

Note: atu hi cu nan i ton hmasat bik ni ah biahal lo dingmi a si. Hmai thla a chuak dingmi Chin Digest ah ‘i ton hmasat bik tik ah zei bia dah na ruah lai’ timi kan hun tial than te lai.

Ref: Chin Digest, Vol.2, No.2| 2016 April|

About The Author

Na ruahning rak langhter ve.. (Leave a comment)

%d bloggers like this: