Paletwa Peng Ah Khuami Ralkap Nih Kuli An Phorhter Hna
Salai CungCung|2019 May 20| Chin ramkulh Paletwa peng ah Kawl ralkap nih khuami cu kuli an phorhter hna tiah CHRO (Chin Human Rights Organization) nih May 17 ah thawng an thanh.
Paletwa peng Khamaukwa khuate pakhat ah khalahyah-77 ralkap nih an ei ding pawl phorh ding tiah Miza khuami le Miza khuachung ah ralzaam in a ummi 31 cu May 15 ah ralkap kuli an phor tiah kuli phortu hna biachim mi cherhchan in CHRO nih thawng an thanh.
“April thla chung ah voithum kuli kan phor, May 9 in tu ni tiang Miza khuami nih mah le caan cio in an phorh hna. Kei a hnu bik kuli ka phorh cu May 15 tiang hi a si. Kan mah nih kan duh lo nain an mah lei nih voitam pi a kan chimh caah bawmh lo cun a tha lai lo kan ti caah tubantuk in kan phorhpiak hna hi a si. Kan mah nih cun kan phor duh hrimhrim lo. Tu lio cu daihnak a um lo caah lampi hna ah pakhat khat kan tong sual lai ti kan phang ngai” tiah ralzaam chung in ralkap kuli a phor vemi pakhat nih a chim.
Tu bantuk ralkap kuli a phormi chung ah hin Nu kum upa ngai cang mi le Khirhfa pastor zong an i tel i nihlawh pek in nikhat ah tangka 4000 in an pek hna tiah kan theih.
“Abik in kan phorhmi cu ralkap ei ding facang le an thilri pawl an si. Kan phorhnak lei hi lam le sul a tha lo caah a lak in cun a kan phorhter lo, a man pek in kan phorh piak hna. Hramhram zong in a kan phorh termi a si lo, bawmh kan i hal tiin a kan ti caah kan bawmh ve mi hna hi a si” tiah min chim a duh lo mi pakhat nih a chim.
Kawl ralkap nih an ei ding mi facang pawl cu Paletwa in Miza tiang Tilawng in an phorh i Miza in Kunchaungwa khua tiang cu Motor Cycle in an phorh than. Cycle a kal khawh ti lonak Meng 15 tluk hi lam a that lo tuk caah khuami hna kuli an phorhter hna hi a si tiah kan theih.
Ref: Khonumthung
About The Author
