Philippine President Nih Pathian A Um Taktak Maw Timi Biahalnak A Tuah

0

Salai Aung Aung| 2018 July 11| Philippine President Rodrigo Duterte nih Pathian hi thlachiat ruat lo, misual a si i a um tak tak maw timi hi bia hal tlak thil a si tiah a chim dih le cangka Philippine Khrihfa hruaitu pawl nih rawl ulh in thlacamnak tuah ding an timhtuah.

Asia ram chungah Khrihfa tam biknak Philippine ah Roman Catholic lutlai Romulo Valles le a dang lutlai pawl nih July 16 thawk in rawl-ulh in thlacamnak tuah ding le thliri chawva hlut cio dingah July 9 ah thawngthanhnak an tuah.

Hi RC upa pawl nih hin President Duterte cu Pathian zong min auh duh loin a soisel, mithat lainawng a ti, palh tuk in sual a puhmi le sual dohnak ah thah hi a dikmi a si ko tiin a chimmi pawl ruangah Khrihfa mi hna nih Pathian dawtnak vel le tlukruannak caah thla an cam.

President Duterte le Khrihfa hruaitu pawl kar ah pehtlaihnak a tlamtling lo ngai i June thla chung ah khan Duterte nih Pathian nih hin Adam le Eve hi a rak ser tak tak ko hna a si ahcun Pathian nih a sual tuk mi a si hnga tiah a chim hnu in an kar lak rem lonak a zual chinchin.

President Duterte nih muilang (TV) in zapi sin biachimnak a ngeih lio ah Baibal ca chung i Adam le Eve nih minung taksa duhnak hrial kho lo ding tiang in ziah Pathian nih cun a ser hna hnga tiah biahalnak a tuah lengah minung hi Pathian nih a ser timi Baibal ca zong hi biahalnak tampi a tuah.
Ref: VOA

About The Author

Na ruahning rak langhter ve.. (Leave a comment)

%d bloggers like this: