May 28, 2024

President Ca Ding Ah Thimmi Vice President U Win Myint Konglam

0

Salai Holy Tawk Tling Thang| 2018 March 23| Pyithu hluttaw nih President ca ding ah a thimmi le a fehter cangmi Vice President U Win Myint konglam hi fiang deuh in na hngal ve cang maw? A sianginn kainak, ramkhel rian a tuannak, thong a tlaknak le Myanmar ram thimnak (election) kip thimnak aa cuh fate MP a tlinnak tibantuk amah konglam tawi The Chinland Post careltu kan hun in hrawmh hna.

U Win Myint (kum 66) cu 1951 November 8 ah a chuak. A chuahkehnak cu Irrawaddy ramthen, Danuh-phyu peng Ngaungchaung khua ah a si. Atu cu Yangon ramthen, Tamwe peng ah khua a sa cang.

Yangon Arts and Science University ah Geology in B.Sc, H.G.P le RL in degree a lami a si. 1985 in central baiceih zung (high court) ah sihne rian a rak tuan. 1990 kum thimnak tuah lio ah Pyithu hluttaw thimfung hmunhma in MP a rak tling. Cun, 2012 caankarlak thimnak zong ah MP a tling. 2015 thimnak tuah lio Yangon ramthen, Tamwe peng, Pyithu hluttaw thimfung hmunhma in MP tlingmi a si. Amah hi a hramthawk te in NLD party ah a lutmi a si.

2016 February 1 in 2018 March 20 tiang Pyithu hluttaw ah Speaker (Chairman) rian a tuan. 2018 March 21 ah Pyithu hluttaw Speaker rian in aa phuak i March 23 ah Pyithu hluttaw hluttaw nih Myanmar vice president caah an thim. March 26 ah tuahmi ramkomh hluttaw ah atu lio Vice President Henry Van Thio le U Myint Swe he President aa cuh lai.

Win Myint hi 1988 liote khan NLD hrihhram he pehtlaihnak thukpi a rak ngei cangmi a si. 1988 kum 8888 mizapi buainak ah a chungpi tiang a rak cawlcang vemi pakhat a si. Cu ruang ahcun nawlngeitu cozah nih voi 3 tiang thong an rak thlak bal.

NLD CEC (Central committee) ah saupi chungtel a tuan cangmi a si pin ah atu hi NLD CEC ah secretary chungtel pakhat zong a si. 1988 lio hrawng khan Win Htein, Nyan Win tleicia Win Tin le Win Myint hi NLD party ah zumh bikmi thla pali tiah auhphahmi an si. Daw Aung San Suu Kyi he nai lawng si lo in hlanpi khan naihte in pehtlaihnak a ngeimi le rian a tuanti cangmi an si.

Cu ruang ah 2015 kum thimnak in MP a tling cangk Daw Aung San Suu Kyi nih Pyithu hluttaw speaker thutdan a pek. Hluttaw Speaker a tuan chung ah upadi le phungphai tampi a serchuahpi khawh hna. A hleikhun in mizapi nih mitthli he an tuarmi le an tahhnawhmi vawlei hmunchuhmi kongkau ah mizapi leikap in fakpi in a tangmi le riantuantu pakhat zong a si.

U Win Myint hi mizapi aiawh ah riantuantu a simi le mizapi nih riantuanpiaktu ding ah thlahmi Pyithu hluttaw palai riantuanmi felfai lo ruang le daithlan ruang ah mizapi leikap in fak ngai le raltha te in bia achim ngamtu le MP pawl a si ngamtu pakhat zong a si. Dinfelnak a tanh ngaimi le thil a dikmi cung ah raltha te le khulrang ngai in hmalaknak a tuah tawntu hluttaw speaker pakhat zong a si tiah theih a si.
Ref: Wikipedia, DVB, BBC

About The Author

Na ruahning rak langhter ve.. (Leave a comment)