Putin cancer a si tiah thawng a leng
The Chinland Post | 2022 May 16 – Russia President Vladimir Putin cu cancer a si i fak ngai in a zaw tiah thawng a leng.
Social Media cungah a hlan tein Putin zawtnak he pehtlai in biaruahnak pawl a rak um bal. Atutan cu internet cungah a rak kaimi aww kumhmi (Audio file) pakhat nih mah thawng hi a than ter chin.
Cu aww khumhmi cu New Lines Thawngzamh nih a rak langhter i Russia cozah he aa naihniammi mirum pa pakhat i a aww si. Mirum pa Boris Karpichkov nih Russia President Putin cu thi cancer a tuar i a dam lo tuk tiah a aww khumhmi chungah a chim. Boris Karpichkov zong hi Putin bantuk in Soviet KGB Intelligence ransangtlai pakhat a rak si bal i Putin i a chunglei minung tiah ruahmi a si.
Ukraine le Russia raltuknak lioah Putin a ngandamnak cu a zual khun tiah zumh a si tiah New Lines nih a ṭial. Putin nih zeibantuk phun thi cancer zawtnak dah a ngeih ti cu a langhter lo.
Kum 69 a si cangmi Russia President cu a ramkhel lamthluan chungah hma a tuar tawn. Voikhat cu Hockey puai pakhat a zuamnak ah rang cung in a tla bel tiah a langhter.
Naite ah a chuakmi video pakhat ah, Putin cu Minister of Defense Sergei Kuzhugetovich Shoigu he meeting an tuah lioah cabuai kha fekṭhup in aa tlaih kha hmuh khawh a si. Mah hi Parkinson’s zawtnak a hramthok a si tiah an ruahdamh.
Russia cozah i Grand Kremlin Palace nih Putin zawtnak he pehtlai in hlan lioah bia alnak an rak tuah lengmang. Ukraine raltuknak ruangah nitlak lei phu hna nih sipuazi phihkharnak an tuahmi cungah Putin cu Russia mirum pawl nih an rem lonak a karh chin timi thawngpang zong a leng tiah a langhter.
About The Author
