Ralkap Nih Tlaihmi Salai Cung Bawi Lian Nikhat Hnu Ah An Thlah Than

0

Thantlang Mino Salai Cung Bawi Lian Ralkap nih Tlaihmi Thlah lio Thantlang Mino He/ TCP

Salai Chuncha| TCP-Thantlang| 2021 March 11| Thantlang mino pakhat asi mi Lungtial Sang khuasa Salai Cung Bawi Lian cu nizan (March 10,2021) zanleisang sml 6:00pm tluk ah ralkap minung panga nih a umnak a si mi Laipawnglung ah an tlaih hi a si. Salai Cung Bawi Lian cu Laipawnglung ah a riak pengmi asi i CDM atuah mi ralkap pakhat cycle in na phurh anti caah atu bantuk ralkap nih an tlaih hi asi i an tlaih lio ah hin ralkap pakhat nih a inn chungah aluh hnawh in ralkap pahnih nih Hakha lam in le adang pahnih nih Tlangrua lam in an hngah, azam sual lai ti an phan ruang si kho men. Cungbawi cu ralkap pakhat nih cycle in a phurh i ahnu in cycle pahnih (Ralkap pali) nih an zulh i Ralkap sakhan ah an kal pi tiah Laipawnglung ah ariak ve mi sin in kan theih.

Thantlang mino hna zongnih kan hawi asi mi Salai Cung Bawi Lian an tlaih ti an theih le cangka TYA zung ah i fun in hmunkhat ah Ralkap Sakhan kal hnawh in an mino hawi chuahpiak dingin hal dingah timhlamh nak an ngei colh ve. Cann tlawmpal an i hngah hnu ah TYA zung in tlaih atong mi chungkhar he biaruahnak an ngeih hnu ah ralkap lei phone chawnh ta ding in biakhiahnak an ngei i ralkap lei nih cun  rak kai duhhlah u aherhlo tiangin buainak a chuak sual lai tiah anti len hna nain mino nih an duhlo caah kai chih dingin bia an fun i milu 500+… nih ralkap sakhan ah an kal hnawh hna. Mino hna sakhan an phak caan tlawmpal ah Thantlang khuabawi, khuanu khuapa le Biaknak lei kan pale an hun phan colh ve. Mino zapi in sakhan tiang va luh kha ai ninglai loding asi caah mipi aiawh in Pu Lawm Bik, Rev.Dr Sang Cung Uk, Thantlang khuabawi le tlai atong mi chungkhar(Cungbawi niletang) tiin sakhan ah an va ton hna i cu chung cu sakhan kam in mino nih an zapi in an hngah ko hna.

Ralkap sakhan a kal mi mipi sin an phak in biachim nak le thawngfianh nak an ngei. “Tuzan cu tin ko ulaw Salai Cung Bawi Lian hi kan tlaih mi asi lo, biahal ding kan ngeih caah chikhat kan auh bia asi thaizing zinglei sml 8:00am ah chungkhar le upa he ra than te ulaw kan in thlahpiak ko hna lai,” anti caah mipi an tian than. A thaizing sml 8:00am in mino an i fun than i sakhan kal ding timhlamh nak an ngei than. Tlaih atong mi chungkhar le Rev.Dr Sang Cung Uk cu ralkap sakhan ah an kal i ralkap he biaruahnak an ngeih hnu ah mipi sin an rak phan ve. ” Hi case hi phundang asi. Hi ka a um mi ralkap zong an i ruahning in thil a kal dih lo Salai Cung Bawi Lian hi CDM atuah ruangah tlaih mi asilo i lamzawh ruangah tlaihkhih mi zong asilo. CDM atuah mi ralkap pakhat cycle in aphurh sual mi asi caah rianrang in thlah awk cu a tha lai lo nain him tein kan chiah ko lai tiah bia an kan kamh ko,” tiah mino sin an chimh hna nain mino zong an i lungsi dih ve lo. Mino zapi GAD zunghmai ah an i tong than i mino ai awh zong in micheu khat cu zungchung lut in bia an va ngai ve. GAD zunglei in siseh Thantlang khuanu khuapa le biaknak lei kan pale zong nih kan mino pakhat cungah tuarhar thil a phak lai kan duh cio lo mipi lei ah fek tein kan dirko asi khawh chungin thlah dingin kan i zuam ko lai an ti caah mino hna zong lamzawh than dingin timhlamh nak an ngei than.

Mipi lamzawhnak ah ni dang khel an au tawnmi pin ah tlaih atong mi Thantlang mino a rianran nak in kan thlahpiak uh tiah an au chih. Voidang khel siloin Rakap sakhan tiang le khuacuanhtlang(Viewpoint) tiang lam zawhnak an ngei. Tuni ( March 11,2021) zanlei sml 6:00pm tluk ah Salai Cung Bawi Lian cu hliamhma tello him tein an thlah than cang i Thantlang mino hna zong nih an inn ah lennak le lawmhpi nak an ngeih.

” Zeitin hmanh an ka tuah lo, ti le rawl zong tha tein an ka pek ko i a ih hmun zong arem ko bia an kan hal i mah cu asi ko. Thantlang mino nih an kan dawt ka hmuh caah ka lawm tuk,” tiah tlaih atong mi Salai Cung Bawi Lian nih The Chinland Post ah a chim.

About The Author

Na ruahning rak langhter ve.. (Leave a comment)

%d bloggers like this: