Ramthen Uknak Zung Ah Pumpak Inn Pumhnak Caah Hman Ding Nawlhal Ca Pumpak In Zung Ah Pekmi An Cohlang Lo

0

Salai Ngun San Aung| 2018 March 15| Magwe ramthen uknak (Htwe Oh) zung nih Setohtaya peng Dungchaung khuakomh Tatke khua chung ummi Khrihfa pawl nih pumpak inn cu pumhnak ah hmang ding in nawl halnak ca an tial mi zung ah pumpak in an va pek mi cu zung riantuan tu nih cohlang loin cakuat nak (saa-teih) in rak kan kua tiah an kir ter nak kong ca pek ah a kal mi Pu Thawng Lian Mang nih Chin Human Rights Organization sinah thawng a thanh.

Setohtaya peng uk nih ruahnak cheuh ning in February 19, 2018 ah khan Tatke khua um U Pale inn cu pumhnak ah hman ding nawl hal ca pek dingah Magwe khua pi ah an va kal nain ramthen uknak zung nih ca cu an rak rel i hibantuk ca hi cu saa-teih in nan kan kuat ah a tha deuh lai tiah an khirh hna hi a si.

“Saa-teih in kuat ding an kan ti mi cu zei ruang ah timi ka hal hna tikah hihi cu report ca a si caah saa-teih in kuat phung a si an kan ti. Ziah hi cu report cu a si hnga nawl hal nak ca a si hi ka ti nain zeihmanh an ka let lo. A chim cia bon a chim caah zei hlei tuah awk kan hngal lo i Magwe i saa-teih in kan ca cu ka va kuat” tiah Pu Thawng Lian Mang nih cun a chim.

“Cuticun Magwe saa-taih in cun kan kuat i zung riantuan pawl nih cun nikhat chung ah ca hi nan kuat duhnak hmun a phan lai an kan ti nain tu hi thla khat a si cang zeihmanh uknak zung lei in ca an kan let lo. Anmah ca leh kan hngah caah zeihmanh kan hlathlai ve lo” tiah Missionary a tuan mi Pu Thawng Lian Mang nih cun a chim chap.

Mah hi ti ca an tial nak a ruang cu Zarhpi ni ah pumpak inn i an i pumh lengmang mi kha Tatke khua phungki nih penguk zung ah an report hna. Cu kong cu Penguk bawipa nih amah lawng in a ceih ngam lo caah ramthen uknak zung ah pumpak in kha pumhnak ah hman ding nawlhal nak ca tial uh tiah ruahnak a cheuh mi hna ning in an tuah nak a si.

Sagaing ramthen Kalaymyo hrambunh Lairawn Baptist Association nih 1996 thawk in Magwe ram chung Minbu pengkomh Ngaphe peng ah an tuan tawk mi Mission rian cu Setohtaya peng Tatke khua tiang a karh cang. Cu ti mission rian tuannak in Khrihfa ah a cang mi pawl hna cu Buddha a bia mi Phungki le mizapi cheu khat nih a phun phun in namneh le hnahnawh nak an pek peng rih ko hna tiah kan theih.
Ref: CHRO (Chin Human Right Organization)

Biakilh: Hmanthlak khi thangthat pumh he aa tlaknak caah taarmi a si. Magwe ramthen ah a cangmi si lo in CBCUSA thangthatnak ngeih lio a si.

About The Author

Na ruahning rak langhter ve.. (Leave a comment)

%d bloggers like this: