Rih Tidil Pawng Naka-yung Lam Kauhchapmi Cung Ah Khuami An Lungtling Lo
Salai Cung Cung| 2018 May 17| Chin ramkulh cozah sinpi budget in Rih tidil pawng Nakayung lam kauhchap dingmi cung ah khuami an lungtlinglo tiah Rih Lentlang Youth Association in ruahnak petu Pu Zozedinga nih a chim.
“Hi lam an kauhchap ah cun leikuang cheukhat an rawk kho, kokek tupi hual hna zong an rawk kho. Nakayung lam a si ruang ah kauhchap kan duh lo bia si lo in kokek tupi hual a hnorsuan khawh dingmi a si ruang tu ah a si” tiah Pu Zozedinga nihcun a chim.
Leikuang hmun hna cu pungsan 7 in ngeihmi dum pawl an si tiah theih a si i Myanmar ram cu democracy ram a si caah a hnorsuan dingmi dum ngeitu hna he i ceihmai hnu le kaphnih hnatlaknak in an tuah si ahcun kan cohlan ko lai tiah Rihkhawdar khuami No.1 sang khuabawi Pu Chanliana nih atu bantuk in a chim.
“Lam kauhchap nak menmen in cun a rawk ding dirhmun a si lo. Lam an chunhmi vawlei vawr kha an hlonh sawhsawh men belte ahcun cheukhat leikuang an rawk lai. Hi pawl hi lei ngeitu le a hnorsuan khawh dingmi lei ngeitu hna he i ceihmai hnu ah kaphnih hnatlaknak in an tuan ahcun ka cohlan ko. Hi lam kauhchap ding cu tuan deuh ahkhan Chin ramkulh cozah nih Sipin budget in tender an auh i aho nihdah a ngah le a chunh lai belte cu kan hngal lo.”
Hi lam cu atu ah pe 8 a kaumi lam a si i 1990 hrawng ahkhan ralkapcozah nih khuami an rak chunhtermi Rih Tidil helnak lam a si.
Ref: Khonumthung News
About The Author
