Social Media Hmannak Nih A Chuahpimi ‘Nu’ Hna Lungthin Zawtnak
Salai Lian| 2019 June 25 | Social Media (Facebook, Instagram, tbk.) hmannak nih ngakchia tampi karlak ah zawtnak le lungthin nuamhlo in lungrawhnak tiang a phanmi zawtnak phun tampi a chuahpi tiah hlathlaitu nih an hmuh.
Social Media a hmang deuhmi poahpaoh hi lungthin damlonak, lungrawhnak le lungzawtnak an ngei khun.
A bik in, nikhat ah suimilam 5 nak a tam deuh a hmangmi hna sining ahhin, lungzawtnak (depression fakpi in a lut) tiah an hmuh.
A hlei khun in, pa ngakchia nak in Nu ngakchia ah, Social Media nih lungthin leikap zawtnak le lungrawhnak a chuahpi tiah Weforum nih cun a thanh.
Hihi a biapi cu, Online cung ah nu ngakchia hi tuaitam (harassment) le soisel an tong khun i, zaan hngilh khawhlo nak tiang a chuahpi.
Cu lawng silo in an pumrua sining ah lungtlinlonak le i uarlonak a hrin chih. Cucu nih cun, mah le mah i zohchuknak a chuahpi tiah hlathlainak an tuahmi in an hmuh chuah.
Mirang ram Britain (UK) ah a ummi, Mino le Ngakchia minung 11,000 tluk cung ah hlathlainak an tuahmi in hmuh chuahmi a si.
A bik in, kum 14 tluk a simi nu ngakchia hi Social Media an hmang khun. A tam deuh nih cheunga cheuhnih (2/5) nih hin nikhat ah suimilam 3 tluk kan hman an ti. Cucu, pa ngakchia nak in a tampi a tam deuh.
Atulio ah, Social Media hman ning cang kong he pehtlai in le phungphai lei sersiam in thanchonak a ummi kong ah tha tein ruah chih a hau dingmi a si cang an ti. Hi bantuk thil a sertu company pawl nih suimilam zeizah chung dah hman khawh ding (screen time) le chonh khawh a si timi hi tawlrel caan a cu cang tiah hlathlainak tuahtu nih ruahnak an chuah.
Cun, hlathlainak ah lultlai a simi University College London in Yvonne Kelly nih, “Social Media hi khawika le zeitik caan ah hman ding timi khiah a herh. Cun, ngakchia le mino nih anmah le ihnak khaan ah, mobile phone an hmanmi kong hi ruah deuh le khenkham deuh a hau cangmi a si” tiah a chim.
Ref: https://www.weforum.org/agenda/2019/01/social-media-linked-to-higher-risk-of-depression-in-teen-girls?fbclid=IwAR00nKJHhqnCltXDbpqjEtyMbNWuSMwgHzLJ2UFe8UfKSEGkEJHY-l0Xt2w
About The Author
