Tukum Chung Ah Chinram Khuapi Pali AC Nylon Kat-ta-ya An Phah Lai
Salai Elvis| 2019 February 15| 2019 kum chungah Chin ramkulh khuapi a si mi Hakha, Thantlang, Falam le Mindat ah AC Nylon Kat-ta-ya cu ramkulh budget in an phah lai tiah tuanvo ngeitu sin in kan theih.
AC Nylon Kat-ta-ya cu 2017 kum January thok in Hakha khuapi lamthlur pi phah an thok i a dih rih lo mi sii-inn lam an phah lai pin ah Thantlang, Falam le Mindat khuachung phah dingin timhtuahnak an ngeih hi a si.
“Hakha khuachung a tu an phah lio mi khi GTI sianginn tiang a si lai i a rauh hlan ah Sii-inn lam zong phah colh a si lai. Sii-inn ah mi tampi an um ve caah tukum chung ah phah kan timhnak zong a si. Tukum chung thiam ah hin Thantlang, Falam le Mindat zong phah an si lai. Thantlang cu KM 1 tluk rian an thok cang lai. Cun Falam khua hi KM 3 phah a si ve lai, Mindat hi (Km 1- ½) an phah than lai” tiah lam le sul vuanci Pu Sui Thio nih The Chinland Post ah a chim.
AC Nylon Kat-ta-ya Hakha khuapi an phahnak set cu a tha bik pawl (Brazil in a ra mi) a si i a dang cu Tuluk in a rami deuh an si hna lai tiah kan theih.
“Hi kongah felfal tein zohfelnak kan ngei rih lo, tukum chungah kan ngei te lai. A biapi in lam thlur pi lawng a si ko rih lai. Tukum ah hin zei maw zat an phah hna lai i a ra lai mi kum ah Hakha khuachung Cherry lam, Tedim khua phah an si than te lai. Matupi le Cikha tibantuk cu aa phah kho rih lai lo” tiah Vuanci Sui Thio nih a chim.
About The Author
