Tukum Hakha Chin Miphun Ni Khuangcawi Cu Senthang Nih Tuanvo An Laak Lai
Tawk Tling Thang| 2019 January 28| Chin ramkulh cozah nih ramkulh huap in February 20, Hakha ah tuahdingmi Chin Miphun Ni (Chin National Day) khuangcawi tuanvo cu Hakha peng, Senthang nih tuanvo an laak lai tiah kan theih.
Hi kong he pehtlai in Hakha Khuanu khuapa in Pu Ral Kham nih, “Tukum Chin ramkulh huap in tuahdingmi Hakha Chin Miphun Ni ah sunglawi taktak in khuangcawi timh a si. Hi khuangcawinak caah cozah nih ks. sing 30 (3,000,000) budget a tuahpiak. January 27 ahkhan Khuangcawi tuanvo laakpiak ding in Senthang Fellowship in upa ton biaruanak kan ngeih hna i tuanvo laakpiak ding in an kan cohlan cang” tiah The Chinland Post ah a chim.
Senthang Fellowship in Sayagyi Pu Tluang Pum nih, “Tukum Hakha Chin Miphun Ni caah khuangcawi cu kanmah Senthang lei tuanvo khinh kan si. Hihi thil fawi cu a si bak lo nain nunphung sunhsak duhnak lungput he tlamtlinh khawh kan i zuam ko lai. A rauh hlan ah meeting kan tuah colh lai i tawlreltu committee tete zong kan ser lai. Cun, ahodah khuang kan cawi lai timi kan fehter chom colh ko lai” tiah The Chinland Post ah a chim.
Tukum Chin ramkulh huap in Hakha ah tuahdingmi Chin Miphun Ni ah Myanmar rampi President U Win Myint zong an sawm. Hi tuahnak ding caah ks. sing 1000 hrawng hman ding in budget an suaisam. Hihi cozah budget lawng si lo in ramchung ramleng bawmchantu (donor) pawl budget zong aa tel chih lai tiah theih a si.
2017 kum avoi 69nak Chin Miphun Ni ah Hakha Khuathar in Mai Biak Tha Cuai khuangcawi a rak si. 2018 kum ah Hakha Khuahlun in Mai Run Sung an rak cawi. 2019 kum ah tah Senthang peng in ahodah an cawi lai?
Photo: 2018 kum ah khuang an cawimi Mai Run Sung a si.
About The Author
