Ukraine ram chungah Russia ralkap lut dingin Putin nih nawl a chuah cang.

Russia nih Ukraine ram ah cozah doh in Ukraine ram in chuah duh hriamtlai cheukhat pawl an cawlcanghnak hmun Donetsk People’s Republic le Luhannes People’s Republic hna cu a zalong mi ram (Independence) le a mah tein a luatnak a ngei mi ram ah a thanh i Russia ralkap hna cu President Vladimir Putin nih hi hmun hnih ah luh ding in nawl a chuah.

President Putin nih hi Ukraine ram ah a ummi hmun hnih hi Russian ram a rak si i Ukraine cozah nih hriamnam thazaang tlaih in zalonnak a kheltu a kah lengmang hna caah daihnak ser ding ah ralkap ka luhter hna hi a si tiah a thanh.

Putin nih atu bantuk in thawngthanhnak a chuah cangka in US President Joe Biden nih Russian nih ram pakhat nawlngeihnak le ramri a buai. UN nih hnatlaknak phung a buar caah aa tlakning in dantatnak le chawlei phihkharnak kan tuah lai tiah a leh colh.

US le EU ram nih an hruaimi NATO chungtel zong innka hrenkhumh in Ukraine le Russian buainak kong ah ceihmainak an ngei colh ve.

UK Prime Minister Boris nih Russian ngei mi Bank panga le Company pathum cu chawlei phihkharnak a tuah pin ah Germany ram zong nih Russia ram in zinaan a cawk mi tipet le cawl lo ding in hnonnak a tuah ve.

Hungary ram cozah nih Ukraine le Russia karnak buainak a chuah tikah nunchanh ding ah le mipi hartuar bawmh ding ah tiin ramri ah ralkap thazaang tampi a thlah colh ve hna.

Putin nih Ukraine nih NATO luh a timh mi cu biatak te in khamh aa zuam i Ukraine ram hi ram ṭhawngṭha hna nih duhpoah in tuah khawhmi cozah menmen na si tiah ralrinnak a pek.

“Ukraine nih mah hmunhma hna I hriamtlai a tukmi hna vialte a ngol dih a hau. A si lo ahun thichuahnak a chuak hnga dingmi thil vialte hi Ukraine ram nih tuanvo a lak a hau lai” tiah Putin nih a chim.

Russia President Putin i a thiltuah hi vawleicung cozah nih hnatlak mi phung (International Law) kha fiang tuk in a buar tiah UN Gen. Secretary Antonio Guterres nih an chim.

Ukraine ram chung le uknak cung ah a buarmi hi United Nation i phung he aa tlak lo tiah Guterres nih a chim .

NATO i Military Alliance Gen. Secretary Jens Stoltenberg zong nih tulio buainak daihter khawh kan i zuammi hi Russia cawlcanghnak nih a hrawh bantuk a si cang tiah a chim ve.

Source- BBC

Na ruahning rak langhter ve.. (Leave a comment)

%d bloggers like this: