Vawlei cung milu 8 billion kan phan

The Chinland Post | 2022 November 16 – Vawlei cung milu 8 billion kan phan cang tiah UN nih November 15 ah a thanh.

“November 15 ah vawlei cung milu 8 billion kan phan cang i a lonh kho rih mi zong a si” tiah UN Assistant Secretary Maria-Francesca Spatolisano nih New York khua Press Conference ah a chim.

Milu a karh bik nak hmunhma hi Africa a si tiah a chim. Cu chung ah Nigeria ram hi milu 218 million an rak um i atu ahcun 375 million tiang an karh kho tiah an ruahdamh. Vawlei cung milu a tam bik nak India, China le American dih in Nigeria hi a palinak milu a tam bik an si. Sahara hmunhma ah Nigeria dih in Congco, Ethiopia, Tanzania ram hna hi milu an karh ngaingai. Cu hmunhma ah 2022-2050 tiang ah a let 2 in an karh lai tiah an ruahdamh. UN nih a ngeih mi cazin ning ah Sahara hmunhma hi kumkhat chung ah milu 2.5% an karh.

Africa nu pawl hi buaktlak in minung pakhat nih hngakchia 4-5 tiang an ngeih hna. Milu an karh a tam deuh khunnak hi Egypt, Pakistan, Philippines le India ram hna an si i a raa lai mi kum ah China nak in India hi milu an tam deuh te lai tiah an ruahdamh.

2030 a phanh tikah vawlei cung milu 8,500 billion hrawng an si lai i, 2050 a phanh ahcun 9,700 billion tiang a phan lai tiah an ruahdamh. 2100 a phanh cun vawlei cung milu 9 billion kan phan te lai.

Vawlei cung milu kan karh bantuk in eidin le kan herh mi thilrii hna zong hi a har chinchin tiah an chim.

Na ruahning rak langhter ve.. (Leave a comment)

%d bloggers like this: