Vice President Nih Ramkip Khualtlawng Hna Caah Market Thatter Deuh Ding A Forhfial Hna

City Hunter| 2018 June 13| Vawleicung ramkip khualtlawngtu tamdeuh an rak luhnak ding le an karh deuh nakding ah kan ram i tlawn hnawh awk a tlakmi hmun pawl khi vawleipi theih in kan fakthanh deuh awk a si tiah Myanmar rampi Vice President Henry Van Thio nih forhfialnak bia a chim.

June 12, Naypyidaw ah a ummi International Convention Centre-2 ah tuahmi Myanmar ram khualtlawnnak lei rian conference (Myanmar Tourism Conference) 2018 ah rampi Vice President Henry Van Thio nih atu bantuk in a chim hi a si.

Myanmar ram hi vawleicung ramkip khualtlawngtu pawl (tourist) tamdeuh an rak luhnak ding caah ramchung tlawn awk a tlakmi khuallam hmunhma pakhat a sinak kong kha vawleipi nih tamdeuh le thukdeuh in a hngalh khawh nakhnga market pawl tampi thatter deuh i ramkip ah hmual ngei deuh in fakthanh a herh. Hotel akhaan man hna le tlunphorh man (transportation fee) zong hi ramkip thilman hauhmi nak tamdeuh lo in tuah a herh. Cun, khualtlawngtu pawl nih an pekmi (an liammi) man le kanmah lei nih kan tuahpiakmi hna (services) kha aa tlukruan, aa tlak ve ding (value for money) a biapi tuk hringhran tiah Conference ahcun a chim.

Ramkip khualtlawngtu hna fawite in an luh khawhnak ding ah International airport, tilawng dinhnak, ramri luhchuahnak gate pawl tamdeuh le kau ding in hun i visa phunglam remhnak, visa man thumhnak, visa luatnak (visa hau lo in tlawn khawhnak) pawl an tuah cuahmah tiah theih a si.

Myanmar ram nih atu lio Europe rammi a rak lutmi an tlawm nain ASEAN ram pin ah Japan, Tuluk le South Korea rammi tamdeuh an rak luhnak ding caah visa dindorh ding in kan tawlrel cuahmah tiah a chimchih.

Hotel le transportation rian telh in services pawl hi ramkip nakin a man fah deuh ruang ah khualtlawngtu an tlawmdeuhnak a ruang pakhat a si ve. Myanmar ram ah khualtlawngtu tambik a lutmi hi Thai, Tuluk, Japan le Korea ram an si. American, France, Britain, Germany le nitlak lei ram hna zong an rak tlawng pah.

Japan, Tuluk, South Korea ram in khualtlawngtu an tamdeuhnak ding caah visa luatnak tuahpiak ding an tawlrel cuahmah tiah Hotel le Travel ministry zung in theih a si.

June 12 ah tuahmi Myanmar Tourism Conference ah khualtlawn naklei thanchoternak, khualtlawnnak rian he aa pehtlaimi a fami le a laivuang rian pawl thanchoternak, khualtlawnnak rian market strategy le ngunkhuai kongkau ceihmainak an ngei.
Ref: DVB, President Office

Na ruahning rak langhter ve.. (Leave a comment)

%d bloggers like this: