2020 Thantlang Ah Nithum Chung Hlaremh Civui Tuahding In CACC BM Meeting Ah Biakhiahnak An Tuah
Salai CungCung|2019 April 2| Avoi 22nak CACC BM meeting cu March 30 Gangaw peng Oak Hla khua ah an tuah i aralaimi 2020 Thantlang ah hlaremh civui tuahding in biakhiahnak an tuah tiah kan theih.
Avoi 22 CACC BM meeting ah kumdang ceih bal lomi thil phunthum cu, Pakhaknak Thantlang ah hla civui tuah ding, pahnihnak Lai inn sak ding, Pathumnak Lai movie muitawn tuah ding in biakhiahnak an tuah.
“Tutan meeting ah a thar in kan ceihmi cu 2020 Thantlang ah hla civui kan tuah lai. Hla remh zuamnak, pali hlasak zuamnak, pathumnak hlasak zuamnak, pahnih hlasak zuamnak, pakhat hlasak zuamnak tiin kan tuah lai. Hi civui ah thawngtha chim a um lai lo, hlasak lawng tein nithum chung kan tuah lai. 2020 April thla chung ah i tuah seh kan ti nain a ni le thla hi kan thial khawh men than” tiah CACC Art and Culture Department Secretary Rev. Dr. Khar Ling nih The Chinland Post ah a chim.
Hi hla remh zuamnak caah laksawng pawl cu, pakhatnak laksawng Sing 15 le roca, pahnihnak laksawng Sing 13, pathumnak laksawng Sing 10 an si. Hla hi fungkhat i zuam a si lai caah hla phuahtu cu Mang Lian Chawn a si lai tiah kan theih.
Hi hlasak zuamnak caah a dang laksawng cu an ceih rih lo. Pathum in pakhat tiang hlasak zuamnak cu pengkhat pakhat lawng a si lai (tahchunnak ah HBC khirhfabu chung in pahnih thum i zuam a ngah lai lo). Hla remhtu cu CACC ramchung zapi khirhfabu kip nih i zuam khawh a si lai. Hla remh caah laksawng hi sponsor an hmuh ah cun a tam deuh kho. A bik in thazaang an pekmi cu hla remh hi a si. Laimi hi pakhat hlasak tibantuk cu an thiam tuk nain hla remh hi thazaang a der. Cucaah solfa ning tein an sa lai. Minung pakhat nih hla fungkhat a phuahpiak mi hna kha zapi in i zuam a si lai. Coach pawl cu an thim rih hna lo, meeting an tuah than lai i cu ah committee zong an ser chih te lai. Hi hla civui cu CACC ramchung ramleng zapi an sawm hna lai tiah kan theih.
“Zei ruang dah Chin Idol tuah loin hla remh tu kan tuah ti ah cun, Chin Idol cu a tha tuk ve ko nain minung pakhat lawng a si tikah CACC ramchung cu a kaupi i Paletwa, Mindat tibantuk in tampi kan si i hla remh kan tuah ah cun zapi tam deuh hi pehtlaihnak le hawikomhnak caah a tha deuh lai ti kan ruah. Annih pawl cu lai holh zong an hmang kho lo men lai nain laihla hmunkhat te ah kan sak ti ah cun unau kan sinak le kan i hawikomhnak zong kan i theithiam deuh lai. Holh hi Laimi nih kan holh ah kawl holh tlawmpal kan telh peng. Mizo zong nih an holh ah mirang an telh peng. Cun, Laimi ramleng um zong nih an holh ah mirang hi an telh peng. Cucaah hla hi cu zei holh hmanh telh a ngah lo Laihla te a si caah kan Lai holh zong a thangcho chin lai ti zumhnak kan ngei” tiah Rev. Dr. Khar Ling nih a chim.
“Hla civuai cu Thantlang ah tuah ding a si caah Thantlang khuanu khuapa zong tha tein kan va chim te hna lai. Annih cu kan nu kan pa an si caah a kan cohlan ko lai ti zumhnak kan ngei. Laksawng le music lei a herhmi a dang dang vialte hi kanmah nih kan tawlrel lai i a dang pawl khual umnak le eidin tibantuk cu Thantlang lei nih an rak tawlrel ve lai. Khual sawmmi tlunkalnak cu anmah tein an rak i rin ve ko lai. Hi hla remh zuamnak hla civui ah zapi nih thazaang kan pe cio u law, kan mirum pawl zong bawmhnak tampi kan herh ko” a chim chap.
Avoi 22nak CACC meeting ah khual lian a phan khomi hna cu, CBC USA AGS Rev. Za Mang Mualcin, CCF GS le CCCF President Rev. Cung Cin, CCCA Rev. Dr. Dennis Shu Maung, Bangladesh lei in Rev. Peklian Bawm an si tiah kan theih.
About The Author
