All Chin Society Yangon Nih Yangon Ah Sing 120,000 Tluk Dih In Zung Le Hotel Sak An Timh
All Chin Society Yangon sak timhmi Hotel
Salai Ngun San Aung| 2018 July 31| All Chin Society Yangon timi Chinmi zatlang bu nih sing 1023 dih in innhmun ekah 4 an sok i saknak nawl zong an hmuh cang caah kumli chungah pengtlang huap zatlang bu cio zung, zapi tonnak Hall, ACSY zung pi le Hotel tiin a dihlak sing 120,000 tluk dih in inn sak an timh tiah kan theih.
“Yangon ah chin miphun chungin pengtlang le phun tengnge cio huap in dirhmi zatlang bu 19 kan um. Cu vialte nih cun pe 23-50 in zung caah inn dotthum cio kumkhat le cheu chungah an sak lai. Cun minung 20000 tlum dingmi inn le kan nunphung a tlanghtertu Lai thilhlun chiahnak caah inn nganpi pakhat le ACSY caah zung pakhat in kumhnih chung ah sak ding timhtuahnak kan ngei. Mah leng ah hotel nganpi sak ding timhtuah a si i kumli chung ah lim khawh siseh ti kan duh. Inn hmuh hi Yangon khuapi chung North Dagon ah a si i Vice President Pu Henry Van Thio, Chin ramkulh Chief Minister Salai Lian Luai le Yangon ramthen Chief Minister U Pyo Minn Thein bawmhchanhnak thawng in innhmun kan hmuhkhawhnak a si. Inn hmun kan kutcung a phak nak ding ahhin sing 1023 kan dih. A tu hi kum 60 ca gram zong an kan pek cang. Cun a kulhnak ah sing 600 kan dih. Chin ramkulh cozah phu nih a kulhnak caah sing 100 an kan bawmh” tiah All Chin Society Yangon Chairman Pu Peter Ngun Za Cung nih TCP a chim.
Cun hi hmun an cawk le inn sak an timh hnawhchan mi kong ah ACSY chairman Pu Peter Ngun Za Cung nih hitihin a chim.
“Dam lo ruangah Yangon a phanmi hna um thuthnak siseh, lailei in Yangon ah aa thlop i damh khawh loin a thilo mi hna ruak chikkhat dinh pinak tibantuk le ruak tlun pinak tiang tlangtlaknak caah siseh, kan cozah lutlai pawl an rat tikah hotel dang ah riah hau tiloin kanmah ngeihmi te ah an riah khawhnak ding ca, Chin miphun Ni tuahnak, ca a thiam i sianginn kai a huam ko nain a harmi umthutnak le bawmhchanhnak ca tibantuk pawl timhtuahnak le saduhthah he sakmi a si. Hi innhmun hi a tu ah zuar usilaw sing 50,000 man a si hnga. Cu tluk cun man a ngei mi vawlei hmun a si.”
ACSY cu 2015 Pu Henry Van Thio Vice President a tlin lio ah Vice President le Chief Minister lawmhpinak tuahpiak dingin Novotel Hotel ah Pu Peter Ngun Za Cung hrihhawhnak in Chin upa 70 tluk tonnak an rak ngei i an thawk mi a si. Vice President le Chief Minister lawmhnak nak tlangtlatu chikkhat ca committee in an thawk in ramkomh huap Chin MP vialte nih Chin thuam aa khat tein an i hruk khawh nakhnga Chin thuam phun 7 cio pek nak ca tiin le Chin mi vialte nih nunphun thuamthil pakhat kan i hrawm khawhnak ding ca tiin thla ruk ca lengmang in committee voithum an tuah. Cu hnu ah election commission minung panga ser in kum hnih ca hruaitu thimnak an tuah i CEC minung 19 an thim hna. EC dihnak ah minung 80 tluk in sermi zatlangbu a si i ramkomh cozah pi nih phung ning tein hngalh pi mi zatlangbu a si.
Yangon ahcun hi inn hmun hmuh khawhnak ding ca le kulh nak caah tlawm hal nak an tuah dih cang i a rauh hlan ah chin ramkulh chung peng 9 ah tlawng in tlawmhalnak tuah ding timhtuahnak an ngei tiah kan theih. +++
About The Author
