Australia Cozah nih Western Australia Chin Christian Church 400,000 A Bawmh Lai

The Chinland Post| 2019 April 29| Chin miphun dawtu Senator Dean Smith le Isaac Stewart (Liberal For Cowan) nih WACCC Khrifabu Sunday School kainak inn saknak ding ah Aus 400,000 a bawmh hna lai tiah thawng kan theih.

Hi kong he pehtlai in Pu Renny Ceu Lian Mang nih, “Chin miphun a kan dawtu Senator Dean Smith le Isaac Stewart nih WACCC khrihfabu kan fale Sunday School kainak inn saknak caah Australia tangka in 400,000 a kan bawmh lai ti in WACCC Khrifabu pumhnak ah thawng thanhnak an ngei” tiah The Chinland Post ah a chim.

“Australia Prime Minister Scott Morrison nih Perth khua mizapi he tonbia ruahnak ah pek te ding a si. Hi tonbia ruahnak ding ah Chin Khrifabu hruaitu upa le Community upa hna cu sawm dih an si caah Bawipa min thangthat si ko seh” tiah a biapeh ah a chimchih.

Australia Senator Dean Smith hi Australia cozah le hluttaw in a hmasa bik Chinram a rak tlawngmi le Chin miphun le ralzaam kongkau ah fakpi in rian a kan tuanpiak khotu senator pakhat a si. Australia Parliament chung hrimhrim zong ah Chin miphun kongkau a kan chimphuanpiaktu zong a si fawn. Laitlang a rak tlawn lio hrimhrim zong ah Pu Renny Ceu Lian Mang nih a rak zulh.

Pu Renny Ceu Lian Mang hi Western Australia- Perth ah hram a bunhmi Chin Charity Inc zatlang bu ah Chairman a tuan  liomi a si. Chin Chairity Inc hi Australia rampi huap in dirhmi Australia Chin Federation he pehtlaihnak thate in a ngei i rian a tuantimi bu a si. Chin Charity Inc Chairman Pu Renny Ceu Lian Mang hi Australia Chin Federation Inc ah Chairman rian a tuan chih cuahmahmi zong a si tiah kan theih.

Na ruahning rak langhter ve.. (Leave a comment)

%d bloggers like this: