Australia Senator Nih Malaysia Chin Community Upa, Biaknak Hruaitu le Zapi A Ton Hna Lai
Senator Dean Smith nih Tikir Sianginn ah ngakchia a chawnh hna lio _TCP
TCP Online: 2018 September 27| Australia in Malaysia ram ah tlawn ding in a timmi Senator Dean Smith nih Malaysia ah ralzaam dirhmun in hartong mi Chin mipi, biaknak hruaitu le Community kip in hruaitu upa he tonnak a ngei tiah theih a si.
Hi kong he pehtlai in, Chin miphun cung ah zawnruahnak a ngeitu le bawmtu a simi Senator Dean Smith cu October thla zarh khatnak ah Malaysia ah Chin Ralzam pawl ton ding ah timhtuahnak a ngei tiah Pu Renny Ceu Lian Mang sin in kan theih.
Australia um Chinmi aiawh in Australia Chin Federation (ACF) le Chin Charity Inc. (CC) nih Senator Smith August 27 ni ah Chin ralzam ram thumnak an kal khawhnak ding caah bawmhnak an rak hal tiah theih a si.
Senator Dean Smith nih, tutan Malaysia ka kal cu keimah mit hmuh tein Chin ralzam pawl ka ton hna lai. Laitlang ka tlun i, thil sining keimah mit bak in ka va hmuh bantuk in tutan zong ah tuah than ka duh. Culawng siloin Khrihfabu upa pawl le Zatlang Bu upa Independent Chin Communities (ICC) ka ton hna tiah nihin ACF le CC ah upa a simi Pe Renny he tonnak an ngei lio ah a chim.
Cun, Senator Dean Smith nih a chimmi kong he pehtlai in, Pu Renny Ceu Lian Mang nih, “Malaysia tutan a tlawn tikah Chin miphun lawng si lo in, Malaysia um Australian Embassy lei tawlreltu siseh hna, Malaysia cozah le UNHCR zong Chin miphun kong ah tonnak ngei chih a timh hna,” tiah The Chinland Post ah a chim.
Senator Dean Smith bawmhnak kan halmi hi, “Chin Ralzam pawl kirnak ding si lo in ram thumnak an kal khawhnak ding ah bawmhnak kan hal mi tu a si,” tiah Pu Renny Ceu Lian Mang nih a chimchap.
Senator Dean Smith hi Chin miphun caah biatak tein Australia ah rian tuahmi le Chin ram khualipi le khuate cheukhat tiang a phanmi a si. Cun, UNHCR nih Chin ralzam nih vawleipi humhimnak an herh tilo tiah thawngthanhnak a tuah lio ah, an herh rih ko tiah UNHCR sin ah ca a rak kuat hmasatu zong a si. +++
About The Author
