Ayeyarwady Ramthen Ah Chin Affair Minister Ngahnak Ding Chin Miphun Cazin An Laak Lai
TCP-Hakha| 2018 November 15| Ayeyarwady ramthen ah Chin Miphun Kongkau (Chin Affair Minister) Minister ngahnak ding ah 2020 thimnak tanh in Chin Miphun Thanchonak Bu-Ayeyarwady ramthen hruainak in Chin miphun milu cazin an laak lai tiah theih a si.
2014 milu relnak cazin ning in Ayeyarwady ramthen ah Chin miphun milu 12,000 renglo an um tiah an langhter. 2008 phunghrampi pohmah 161(b) ning in ramthen chung miphun tlawm tlangcung miphun cu rampi milu 0.1% (milu 54,000) an tlin si cun Tlangcung Miphun Kongkau minister hmun pakhat hmuh khawh a si.
Chin Miphun Thanchonak Bu-Ayeyarwady ramthen in Secretary Salai Ngun Teng Zam @Salai Thant Shin nih, “Chin miphun milu cazin hi cozah cazin ah 3000 renglo lawng a si. Hihi khuakhat ca tluk hmanh a si lo. 2014 milu relnak cazin ah 12,000 renglo a si. Hiti Chin milu cazin a tlawmnak cu innchungkhar cazin laak lio ah Chin min aa bunh lo caah siseh, innchungkhar cazin tuah tikah Burma (Buddhist) si ahcun tuah a fawi deuh ti ruang ah siseh, hmatpungtin ah Chin min an i bunh ngam lo ruang ah a si. Thate le felfaite in cazin laak ahcun 40,000 asilole 50,000 hrawng paoh cu kan si ko lai ti ka ruah” tiah a chim.
“Chin Affair Minister kan ngah lo ruang ah zei pawl dah harnak kan ton ti ahcun Chin Miphun Ni tuah tikah hlan ahcun khuate ah biaknak puai bantuk sawhsawh men lawng in kan tuah. Chin khua ah zatlang, sipuazi buainak a chuah tikah Kayin cu anmah miphun kongkau minister sin ah an va tawlrel khawh. Chin tu cu, cu bantuk in tuah khawh a si ti lo. Ramthen hluttaw ah Chin Miphun Ni le Chin caholh cawnnak caah budget an hal i bawmh ding in biakamhnak a pek hna. Asinain Chin miphun kongkau zung a um lo caah a buai. Cu ruang ah Kayin Affair Minister sin in budget a kan cheuh” tiah Salai Ngun Teng Zam @Salai Thant Shin nih a chim.
November 11, Chin Miphun Thanchonak Bu-Ayeyarwady ramthen cathanh chung ah Ayeyarwady ramthen ah khua a sami Chin miphun milu cazin felfaite in laak ding timi an telhchih. Asinain, anmah ah tangka thazaang, fimnak (Technician) le an laakmi milu cazin cung ah cozah nih a hngalhpi hna le a cohlanpiak hna a herh.
Kan si khawh chung thazaang dihlak chuah in kan i zuam lai. Kan tuanchuah khawh ahcun hmailei chanthar caah an thinlung a dam lai tiah Salai Thant Shin nih a chim.
Ayeyarwady ramthen ah Chin miphun hi peng 8 chung in khuakip ah khua an sa cio tiah theih a si.
Ref: Zalen
About The Author
