Chin Miphun Ni Ah Kanbawza Nih Chinram Caah Tiphorhnak Motor Thar Pali A Bawmh Than

Salai Elvis| 2019 February 22| Kanbawza (KBZ, Brighter Future Myanmar Foundation) nih Chin ramkulh caah tiphorhnak motor thar pali a bawmhmi cu tukum, Hakha ah tuahmi Chin Miphun Ni caanhmannak donhhlei cung Minister U Soe Htet sin ah  pekchanhnak an tuah tiah kan theih.

Hi bawmhnak cu KBZ in Brighter Future Myanmar Foundation haotu Daw Nan Hliang Kham nih tawlrelnak in Chin ramkulh chung mizapi sin ah dinti phorhnak ding caah bawmhnak an pek hi a si.

Hi kong he pehtlai in Chin ramkulh chimnak nawlngeitu Minister U Soe Htet nih, “Tukum Chin Miphun Ni ahkhan KBZ, Brighter Future Myanmar Foundation nih Chinram caah tiphorhnak motor pali an kan bawmh. A luancia kum ah khan motor pathum an kan bawmh bal cang. A luancia kum an kan bawmhmi cu; Thantlang, Hnaring le Hakha ah pakhat cio in thenphawt an si. Tutan bawmhnak an kan pekmi pali cu; Matupi, Tedim, Tikir le Hakhathar ah pakhat cio in thenphawt an si lai” tiah The Chinland Post ah a chim.

KBZ, Brighter Future Myanmar Foundation nih an facebook page i an thanh ning ahcun Chin ramkulh caah tiphorhnak motor 9 kan bawmhchanh cang tiah an langhter.

Minister U Soe Htet nihcun, “Cozah sin ah an kan bawmhmi cu tutan hehin motor 7 a si, a taangmi pahnih hi cu cozah sin ah si lo in khuanu khuapa maw asiloah mibu pakhat sin ah an hlut i a si lai” tiah a biapeh ah a chimchih.

Chin ramchung kokek harnak kongah a hlankan runvennak ding ca le hmanding caah ks. sing 1000 zong 2016 kum Chin ramkulh cozah sin ah bawmhnak kan rak pek bal cang.

Cu pin ah 2015 kum kokek ralruang ah harnak a tongmi hna caah KBZ Bank nih Chin ramkulh caah tangka fang in sing 15,000 leng bawmhnak kan rak pek bal cang hna tiah Kanbawza Bank official facebook page ah an tial.

Photo: KBZ bank

Na ruahning rak langhter ve.. (Leave a comment)

%d bloggers like this: