Chin Miphun Ni Hmanpi Ding In Rampi Hruaitu Upa Sawm An Timh Hna
TCP-Hakha| 2019 January 31| Tukum avoi 71nak Chin Miphun Ni caanhmaan pi ding in Chin ramkulh cozah nih sawm awktlak rampi hruaitu upa pawl sawm an timh hna. Khual hi minung 650 hrawng phan ding in an tuak tiah kan theih.
Hi kong he pehtlai in Chin ramkulh Upadi Bawizik Pu Sunny Thang Cung nih, “Tukum Hakha ah Chin ramkulh huap in tuahdingmi Chin Miphun Ni ah Chin ramkulh hluttaw lei khual telh lo in le rampi hruaitu upa hna telhchih in khual hi minung 650 hrawng phan ding kan tuak. Khual dongtu le eidin lei tawlreltu committee caah ks. sing 270 hman ding in cozah sin ah kan hal. Kan halmi zat in a kan pe kho lai maw pe kho lai lo timi cu kan hngal kho rih lo. Chin ramkulh pengkip (peng 9) in nunphung bu le a laamtu ding tibantuk in khual hi an zapi minung 300 ra ding in kan tuak. Ramkomh cozah hruaitu upa telh in ramthen dang in Chin Affair Minister pawl zong sawm kan timh hna. Kan sawmmi hna paoh in an ra kho dih te hnga maw” tiah The Chinland Post ah a chim.
Pu Sunny Thang Cung hi tukum Chin Miphun Ni a tlamtlinnak ding caah midawngtu le eidin lei tawlreltu committee haotu a si.
“Khual pawl hi Hakha BEHS-No.2 le No.3 sianginn ah umter ding in kan tawlrel. Khual pawl eidin chuankhinpiaktu ding ah HBC nubu kan fial hna, nikum zong anmah nih an kan bawmh. Media pawl riahnak inn zong kan tawlrelpiak hna lai. Kanmah Midongtu le eidin lei tawlreltu committee caah ks. sing 270 kan halmi chung in a herhmi ihphah, puan, ti le mei tibantuk pawl zong hmanchih dih ding a si. Khual pawl hi sawm awktlak mi paoh sawm dih kan timh hna nain kei hi sawmnak lei tuanvo latu ka si lo caah an sawm cang hna le sawm cang hna lo zong ka hngal lo” tiah a biapeh ah a chimchap.
Tukum Hakha ah tuah dingmi avoi 71nak Chin Miphun Ni ah Lai Paih, Khuangcawi, hlasak (show), nunphung laam a phunphun hmuhsaknak a um lai. Lai Paih caah ks. sing 30, Khuangcawinak caah ks. sing 30, Music lei caah ks. sing 100 hrawng hman ding in budget an tuakchunh. A zapi hman ding in timhmi budget hi ks. sing 500 renglo a si. Hihi cozah budget lawngte si lo in ramchung upa hna le company cheukhat sin bawmhhalmi chawva tampi aa tel chih lai tiah kan theih.
About The Author
