Chin Ramkulh Ah Khuapi Lak Kahdohnak An Thawk Ve Cang
The Chinland Post | 2023 November 14 — Chin ramkulh ah CNF/CNA hruainak in Chin miphun dothlennak phu pawl nih khuapi lak kahdohnak an thawk cang i ralkap caah a biapi mi kahdohnak hmunhma a si mi le pehtlaihnak lampi a si mi India-Myanmar ramri ah a um mi, Rihkhawdar khua cu November 13 ah an uk khawh dih cang tiah CNF chimphuannak nawl a ngeitu Salai Htet Ni nih Khonumthung Burmese ah a chim.
“Ralkap phu pawl sipuazi lei in an i bawmhnak ah a biapi mi khua a si caah kan lak hi a si. Anmah caah a biapit bantuk in kanmah ca zong ah kahdohnak he pehtlai in a biapi tuk mi khua a si. A voikhatnak bik khuapi lak kahdohnak kan tuah mi a si. Pehzulh in khua kan uk khawh nakhnga mipi le kanmah ṭanṭinak a biapi tuk. A ṭha bik in timhtuahnak kan ngei” tiah a chim.
November 12 ah Chin dothlennak phu pawl nih Rihkhawdar khua cu an tlaih khawh cang i hmunhma zohfelnak an tuah lio ah India-Myanmar ramri gate ah ralkap thandar a thlak i CNF thandar an thlai.
Rihkhawdar khua lak kahdohnak ah CNA, CDF-Hualngoram, CDF-Thantlang, PDA, CDF-Zanniatram hna an i bawm i kahdohnak ruang ah CNA ralkap 5, PDA chungtel 1 an nunnak a liam. 10 leng hliam an tuar i cheukhat hi an hma a fak tiah theih a si.
Ralkap sakhaan chung in hriamngan 2, meithal pawl le kuanzen tampi an lak khawh a zat a fiang in theih a si rih lo tiah Salai Htet Ni nih a chim.
Ralkap lei Major 1 telh in 7 nih a sung an pek i ralkap 30 leng India lei ah an zaam i India cozah nih a kilven hna tiah theih a si.
Vanlei kahdohnak le mipi hna nih bomrap ral an hrial khawh nakhnga Rihkhawdar khua No. 1, No. 2 a pehtlaih tertu lam cu CDF-Hualngoram nih November 14 ah an phih chung.
Kahdohnak chung ah ralkap lei nih vanlei le hriamngan in kahdoh an i bawmh caah khuami 10 leng an i hliam. India ramri chung zong ah hriamngan a tlak caah ralzaam hngakchia 1 a thi i le upa pakhat aa hliam.
Rihkhawdar khuami 5,000 leng India, Mizoram lei ah an zaam tiah theih a si.
About The Author
