Chin ramkulh Ah Sianginn Aa Ap mi Siahngakchia 50,000 Deng An Um Cang
The Chinland Post | 2023 June 6 — Chin ramkulh ah SAC kuttang sianginn ah sianginn aa ap mi siahngakchia 50,000 deng an um cang tiah Chin ramkulh fimcawnnak zung nih June 5 ah a thanh.
Peng 9 a umnak Chin ramkulh chung ah a rawk mi Thantlang peng lawng ah sianginn an awng kho lo i adang peng 8 chung ah a um mi sianginn 390 an awn khawh tiah theih a si.
Sianginn an awn khawhnak peng chung in Paletwa peng ah sianginn 223 a um mi sianginn a tambik an awn khawhnak peng a si. Kanpetlet peng hi sianginn pakhat lawng a si caah a tlawm bik an awnnak peng a si.
Hakha peng ah sianginn 9, Falam peng ah sianginn 11, Tedim peng ah sianginn 48, Tonzang peng ah sianginn 71, Mindat peng ah sianginn 4, Matupi peng ah sianginn 26 a um.
Chin ramkulh chung ah sianginn apnak an cohlan ni thawk in June 5 tiang sianginn a ap mi 49,741 an um caah SAC ralkap nih hramhram in uknak a lak hnu ah sianginn aa ap mi an tam bik kum a si i 2022-2023 cacawn kum ah sianginn aa ap mi siahngakchia 22,000 leng lawng an um caah a let 2 in an tam.
Sianginn aa ap mi chung ah Paletwa peng hi a tam bik an si i siahngakchia 22,393 sianginn an kai i Kanpetlet peng ah siahngakchia 256 an kai. Tedim peng ah siahngakchia 9,667 sianginn an kai i Hakha peng ah siahngakchia 3,137 sianginn an kai. Cun Mindat peng ah siahngakchia 1,599 sianginn an kai caah Chin ramkulh chung sianginn a kai mi siahngakchia hi 49,741 an um.
SAC kuttang fimcawnnak zung nih sianginn kai a cu cang mi hngakchia zapi sianginn an kai khawhnak hnga kum 5 hngakchia pawl kha KG kai ding, kum 6 a tling cang mi kha Grade 1 kaiter ding tiah thawng a thanh i May 31 tiang sianginn ap khawh a si lai tiah a thanh ko nain June thla dongh tiang siahngakchia an cohlan hna lai tiah thawng theih a si.
About The Author
