Chin Ramkulh NLD Chairman Pu Zo Bawi 2020 Thimnak A Lut Lai Lo; Pu Sonny Thang Cung nih A Thlen

Salai Josephbawi| TCP-Hakha| August 1, 2020| 2020 Kawlram thimnak ah NLD aiawh in Hakha No.1 Pyine Hluttaw in luh aa timmi Chin ramkulh NLD Chairman Pu Zo Bawi cu NLD Central nih Hakha Pyituh hluttaw ah cuh ding tiah hmunhma an rak thlen hnu in cuh ding aa timmi aa let I amah aa rak timnak Hakha No. 1 Ramkulh Hluttaw ah tulio Chin ramkulh Cozah Upadi bawizik Pu Sonny Thang Cung luh dingin NLD central ah ca an kuatthan tiah theih a si.

Hi kong he pehtlai in Pu Zo Bawi nih “ Chin ramkulh NLD Party riantuanding a tam caah keimah tu icuh tilo in Pu Sonny Thang Cung tu icuh than dingin timtuahnak kan ngei.” Tiah The Chinland Post ah a chim.

Pu Sonny Thang Cung nih “ NLD central lei nih an rak thlenmi hmunhma khan silo in Pu Tial Ling zong Pyituh ah icuh than ding le Keimah hi No.1 Ramkulh Hluttaw Pu Zo Bawi aa timhnak in khan icuh ding an ka ti caah cu ticun Central lei zong ca kan kuat. NLD Central lei zong nih cu ticun an kan cohlan ko lai tiah ka ruat i fiang tein ka chim kho rihlo” tiah The Chinland Post ah a chim.

2020 Kawlram Thimnak ah Hakha NLD caah icuh ding an timtuahmi cu Pyituh in Pu Tial Ling Amyotha No. 1 in Dr. Aye Aye Ngun, Amyotha No. 2 in Pu Ngun Vung, Ramkulh (Pyine) No. 1 – Pu Zo Bawi le Ramkulh Pyine No. 2 in Pu Pu Sui Thio an si nain Central NLD nih an fehtermi hna cu Pyituh Hluttaw in Pu Zo Bawi, Amyotha No.1 in Dr. Aye Aye Ngun, Amyotha No.2 in Pu Ngun Vung, Ramkulh No.1 in Pu Tial Ling, Ramkulh No.2 in Pu Sui Thio hna an si. Central NLD thlenpiakmi ning silo in ahmasa an rak halmi ningin Pyituh ah Pu Tial Ling I cuh ding le Ramkulh Hluttaw No.1 Pu Zo Bawi hmunhma ah Pu Sonny Thang Cung I cuh dingin cung lei ca an kuat than hi a si. Pu Zo Bawi hi Central NLD nih aa cuhnak ding thlenremnak an rak tuah hnu in tu bantuk cuh than lo ding aa tim hi a si I zei ruang set ah ti bel theih a si rih lo.