Chinram Ah Thlichia Nih Inn 85 Renglo A Hrawh
TCP-Kalay| 2019 April 3| Chinram chung Tedim, Cikha, Tonzang, Matupi, Mindat, Paletwa, Thantlang peng le Sagaing ramthen Khampat peng ah March 31 zanlei thlichia a hran ruangah Inn, Sianginn le Biakinn thlungkhuh tamlak te a hrawh tiah kan theih.
Thli a hrangmi nih Tedim peng Seizang khua ah inn pakhat, Lunmual khua ah inn 5, thlungkhuh a hawh tiah penguk zung in thawng theih a si.
Cikha peng Heicin khua ah inn 17 le biakinn 3, innchungkhuh a rawk i Tonzang peng Tuitum khua ah inn 1 zong thlungkhuh a rawk tiah peng thawngthanhzung nih thawngthanhnak a tuah.
Thantlang peng Khuabung(B) ah inn 5 a hrawh i inn 2 cu fak ngai in a rawk tiah Khuabung khuami sin in thawng kan theih.
Matupi peng Phanaine khua ah inn 5, Phungki sianginn 1, Celeik sii-inn thlungkhuh zong a hawh. Ngalai khua ah inn 8 le biakinn 2, Pamai khua ah inn 14, Leisin khua ah inn 4, Balay khua ah inn 1, Lungngo khua inn 8, Luivan khua inn 2 le Chiangpiang khua inn 6 thlungkhuh a rawk.
Matupi pengkulh Lailenpi peng ah inn 3, Sianginn 2 thlungkhuh a rawk tiah peng thawngthanhnak zung in theih a si.
Matupi khuachung ah a rawkmi chungin ZCC- Zotung Biakinn a cim dih, mei 11kv line le 400v line zong a rawk. Mindat peng yat-toh khuakomh pawl zong mah zan lila ah inn cheukhat a rawk. Thli hran cu caan karlak chung te lawng a si ko nain a fak ngai tiah an chim.
Mindat peng Yakdoh khua ah inn 3, rawlruk 8, Buaisih khua ah inn 2 thlungkhuh a rawk. Paletwa peng Miza khua Bitaung ralzam sakhan ah inn 2, Konepin ralzam sakhan ah inn 3 thlungkhuh a rawk tiah Bitaung ralzam hna sin in thawngtheih a si.
Cun Sagaing ramthen Tamu pengkulh Khampat peng no.1 sang um Sub-Middle Sianginn ah canphio 100 renglo a hawh rih.
Khuacaan thanhtu zung nih April 4 thawk in Chinram telh in ramthen 10 ah thli le ruah le tektlak in rial a tla kho tiah March 29 ah ralrin peknak thawngthanhnak an tuah.
Credit: Chin State, Zalen