Chinram Cozah Nih Peng 4 Le Pengkomh 2 Pekchap An Timh
Tawk Tling Thang| 2019 April 23| Chin ramkulh cozah bu nih 2019-20 chung ah peng (Town) 4 le pengkomh (district) 2 pekchap ding in timhtuahnak an ngei tiah kan theih.
Hi kong he pehtlai in Chin ramkulh chimrelnak nawlngeitu Minister U Soe Htet nih, “2019-20 budget kum chung ah Chin ramkulh cozah bu nih peng (town) 4 le pengkomh (district) 2 pekchap ding in timhtuahnak kan ngei. Cucu; Tedim pengkulh in peng pahnih le Paletwa pengkulh in peng pahnih, Tantaung le Miza an si. Pengkomh pahnih cu Tedim le Paletwa an si” tiah The Chinland Post ah a chim.
“Peng (Myo) peknak caah tahfung 21 a um. A taktak ahcun peng pek khawhnak ding ah inn 1000 le milu in 5000 an tlin a hau. Asinain, Chin ramkulh cu thanchonak a nuarh tuk caah a dangte ruahpiak in peng hi pek an si. Hi tahfung tlinh in peng pekmi an um rih lo” tiah a chimchap.
Atu lio Chin ramkulh ah pengkulh (township) 9, pengkomh (district) 4 le peng (town) 11 a um cang. Pengkomh 4 cu; Hakha pengkomh (Hakha, Thantlang), Mindat pengkomh (Mindat, Kanpetlet), Matupi pengkomh (Matupi, Paletwa) le Falam pengkomh (Falam, Tedim, Tonzang) an si.
Peng (Myo) 11 cu; Tedim pengkulh chung ah Khaikam peng, Tonzang pengkulh chung ah Cikha peng, Falam pengkulh chung ah Rihkhawdar peng, Waibulah peng, Thantlang pengkulh chungah Hnaring peng, Matupi pengkulh chung ah Lailenpi peng, Rezua peng, Kanpetlet pengkulh ah Cindwe peng, Mindat pengkulh chung ah Makui-innnu peng le Paletwa pengkulh ah Sami peng, Hakha pengkulh ah Surkhua peng an um tiah theih a si.
About The Author
