CPC Heavyweight Paih Cu Bawi Dawt Thang Nih Sing 30 Le Taisawm In Champion A Co

Salai CungCung|2019 April 27| Avoi 2nak Chinland Paih Championship (CPC) Paih cu April 26 in 27 tiang an tuah i  Chuncung in  Bawi Dawt Thang nih tangka Sing 30 le taisawm in Champion a co.

Heavyweight zuamcawh final cu champion hlun Sakta Van Bawi Hmun le Chuncung Bawi Dawt Thang an kai i Bawi Dawt Thang nih a tei. Middleweight champion, zatlang champion le minung tambik teitu cu Hakha Khuathar in Bawi Hlei Sang a si tiah kan theih.

“Tutan avoi 2nak CPC paih kan tuah cu ka lungtling ngai, aa paih mi pawl ruah ning leng in an thangcho, an paih skill zong tampi an thangcho. Kan Lai paih hi a thancho chin lengmang nakhnga kan i zuam peng ko rih lai. Kan paih a zohtu zong ruah ning bantuk in an si ko. Hmailei ah cun khua te lei hi papek deuh in paih chimhnak kan tawlrel lai. Tukum zong hi khuate lei in pengtlang tampi an chuak kho. Avoi 3nak CPC paih zong kan tuah than te lai. Cun tubantuk in a thiam hlei mi thim in special zuamcawh kan tuah than te lai. A ni thla tu cu fiang in kan chim kho rih lo” tiah CPC lutlai Salai Lungthli Tum nih The C hinland Post ah a chim.

“Tubantuk in champion ka co cu kaa lawm tuk, Pathian min zong ka thangthat. Hlan ah cun kaa pai tuk lo. 2015 Kalay Chin Miphun Ni ah bual ka rak co. Cun tutan he champion voi 2 ka co a si. 2016 Hakha Chin Miphun Ni ah kaa pai i  Khuathar Tha Hlei Cung cu ka rak tei i Thawng Cung a rak lut i Thawng Cung nih bual a co. Khuate  paih sawhsawh mi chim lo cun voi 3 kaa pai i voi 2 bual ka co. Hmailei kaa paih le paih lo ding cu chim awk ka tha rih lo. Tu hi Bible lei sianginn ka kai lio a si le biaknak lei rian ka tuan cun kaa pai kho ti lai lo. Kei hi unau pa 6 lakah a hniangbik a si. Biaknak lei hna rian ka tuan rih lo ah cun ka pai te ko lai” tiah CPC Heavyweight champion Bawi Dawt Thang nih The Chinland Post ah a chim.

“Tubantuk zatlang paih, minung tambik teitu, Middleweight champion laksawng ka hmuh cu kaa lawm tuk. Hi hmuhnak ding ah hin tampi training ka tuah. Hmailei zong paih an tuah chung paoh cu kaa pai peng rih ko lai” tiah CPC Champion laksawng pathum cotu Bawi Hlei Sang nih The Chinland Post ah a chim.

Avoi 2nak CPC paih laksawng a co mi hna cu, zatlang paih Champion le Middleweight Champion, minung tambik teitu ah Hakha khuathar in Bawi Hlei Sang, Heavyweight Champion ah Chuncung US in a rak tlungmi Cung Dawt. Special zuamcawh ah Van Ram Awr an si tiah kan theih.

Avoi 1nak CPC champion cu Sakta in Van Bawi Hmun a si i avoi 2nak CPC champion cu Chuncung Bawi Dawt Thang a si tiah kan theih.

Na ruahning rak langhter ve.. (Leave a comment)

%d bloggers like this: