Dothlennak Kum 2 le Cheu Leng Caan Chung Ah Chin Miphun Hriamtlai 300 Leng An Nunnak A Liam
The Chinland Post | 2023 October 12 — Chin ramkulh ah hramhram in uknak a latu SAC ralkap pawl a doh mi CDF hriamtlai nu 15 telh in hriamtlai 300 leng nih ram le miphun caah an nunnak an pek cang tiah Institute of Chin Affairs – ICA nih October 10 ah a thanh.
SAC ralkap nih hramhram in uknak a lak hnu thawk in 2023 October 1 tiang Chin ramkulh ah SAC ralkap le Chin dothlennak phu pawl karlak ah kahdohnak voi 750 deng a chuak i SAC ralkap hriamngan, vanlei kahdohnak le vawlei lei kahdohnak ruang ah CDF hriamtlai 296 le nu 15 tiah an zapi 311 an nunnak a liam tiah ICA nih an langhter.
Cucaah dothlennak a hruaitu hna nih zeibantuk in dah a lam kan thlen lai i asilole a ṭha deuh le biatak thlak in dothlennak kan tuah lai ti mi ruah caan a cu cang tiah ICA Asst. Director Van Sui Sang nih a chim.
CDF hriamtlai, nu hriamtlai an nunnak a liam mi chung in kahdohnak ruang ah minung 15, bomrap ruang ah minung 23, tlaih in velh hnu ah thah mi minung 11, ruak khangh a tong mi minung 5 le hliamtuar hnu ah thlopbulnak si ngeih lo in a nunnak a liam mi 18 an um tiah ICA nih Report a chuah.
SAC ralkap le CDF phufonh pawl karlak kahdohnak ruang ah CDF chungtel 235 tiang an nunnak a liam cang.
Chin ramkulh chung dothlennak caan kum 2 le cheu leng caan chung ah hngakchia 24 telh in mipi 217 an thi cang i 500 leng thong ah hren an si.
Chin miphun sing 1 leng India ramchung peng pawl le Chin ramkulh chung ah harsa ngai in ralzaam dirhmun an phan hna i Malaysia ah Chin miphun ralzaam 80,000 leng an um tiah ICA thawngthanhnak in theih a si.
About The Author
