Falam-Hakha Kahdohnak: Niruk chung ah Ralhrang 70 fai an thi cang, Miphun Ralkap 1 nih nunnak pek, 9 an i hliam
Kawl ralhrang Truck hmantlak (Reuters)
The Chinland Post| 2022 July 14 — Kan hnu thla, June 29 thok in, Sagaing ramthen Kalay in Chin ramkulh khualipi Hakha lei ah a rak kaimi SAC Ralhrang phu cu Falam in Hakha lei an chuak in ni 7 chung ah Hakha an phanh khawh rihlo leng ah, a tlawm bik 73 tluk an thi cang tiah theih a si.
Hi July 8-13 chung ahhin, voi 15 tluk miphun hriamtlai CNF/CJDC Special Force nih Ralhrang le an mawtaw run cu an kham hna nak ah CJDC in pakhat nih nunnak a pek i, minung 9 nih hliam an tuar.
July 8 ah kahdohnak chuah hram a thawk i, Falam in Surbung Airport lei kainak le Rih lei kainak ah kah aa thok hmasa. Hi a nikhatnak Falam khuapi lonhka ah voihnih an i kap i, CNF/CJDC special force lei nih, an tei deuh hna caah, Hika kahdohnak ah a tlawm bik Ralhrang ralkap 15 an thi lai tiah kan theih.
Cun, July 9 hi Taal khua kiangkap ah an CNF/CJDC special force le SAC Ralrang ralkap an i kap than, a bik in Bomb rap le Drone in thlakmi bomb an hman deuh. Hika kahdohnak ahhin, a tlawm bik ralhrang ralkap 3 an thi. July 10 kahdohnak Tlangzar le a kiangkap ahhin, voikhat an i kap. Hika zong ahhin, ralhrang 13 tluk an thi lai tiah upa lei sin in kan theih. A bik in mine-bomb cu Drone in thlak mi bomb hi an hman. Nain, Ralkap nih miphun ralkap lei nih ngeihmi Drone pakhat cu Drone kahnak meithal in an kahpiak hna caah a tla.
July 10 Tlangzar khua in an chuah ahhin, Drone pahnih hmang in an kah than hna tiah kan theih.
A hlei fakkhun kahnak hi Ramthlo khua kiangkap ah July 11 ni ah a si. Miphun ralkap CNF/CJDC nih karceh in an kah hna caah a tlawm bik Ralhrang ralkap 30-40 kar an thi i, bomb lawng silo in Sniper zong nih a hliam hna i, pahnih hi cu siniper kahnak in an thi tiah fehter khawh a si. Cun, ralhrang mawtaw 4 zong an kham. A dang mawtaw 2 hi rawk lak in tuah i, a kal kho lo ding in an tuah. Hitan kahdohnak ahhin, CJDC Special Force (Commando) pakhat nih nunnak a pek, hliamhma fak lo tuar zong an um tiah theih a si.
Hitin, Falam le Hakha lei kahdohnak ah SAC ralhrang lei an thih tuk ruang ah, Falam le Hakha ah bawmchantu ding an hal hna. Falam in, a tlawm bik 50 nih an rak bawmh hna. Cun, Hakha lei zong in bawmhchan ding ah Ralhrang cu an i thawh. Asinain, Hakha lei in CDF Hakha nih an rak kham hna caah hmai an nor kho lo.
Upa pakhat nih, “July 12 ni ah, Hakha lei in a ra mi kah an si i, ralhrang 7 tluk thah an si. Cawbuk Gate zong kah a si. Cun, Zaan ah Thantlang lam i Gate siseh, Hakha University siseh, kah an si” tiah July 13 ah a chim. Tutan kahdohnak ah, miphun hriamtlai hi hriamtling te he an i thawh caah fak ngai in an kham khawhnak hna le an hliam nak hna hi a si tiah an chim.
A biapi in, Falam an rak lonh hnu, Hakha le Falam kar i kahdohnak a thawk ni July 8 thawk in, July 13 tiang pehzulh in The Chinland Post nih thawngpang kip tialmi le pehtlaih awk tha mi CNA/CNF/CDF upa lei sin in theih mi fonhchuah tik ah Ralrhang ralkap 73 an si. Nain, hi cazin hi The Chinland Post nih a dang tein kan hlat chap i, fehter khawh mi a si lo.
CNF in chimnak nawlngei Salai Htet Ni nih, “July 12 tiang ah Ralhrang 67 thah an si cang tiah a chim. Hitin, Ralhrang tamtuk an thih ruang ahhin, Hakha in siseh, Falam in siseh Ralhrang nih Howitzer timi hriam ngan, meng 14-18 karlak ah kap kho mi in Ramthlo, Dokthek tbk. lei ah ah kah lengmang.
Hi kong ah, Falam khuami pakhat nih, July 11 ni thawk in Falam khuapi chung in Meithal ngan an kahmi thawng cu Lihninh in a hnin ko. A thang lawlaw khi a si. July 11 lawng ah khan 8 tluk an kah tiah The Chinland Post ah a chim.
Tutan kahdohnak ah, hriam ngan 79mm, RPG tbk. tha tein an hman khawh lawng silo in, ralhrang mawtaw zong a hrawh lawng silo in, Meng 43 tluk lawng a hlat i, sml. 3 tluk hmanh a rau lo dingmi lam can cu nihin July 14 tiang ah ni 7 leng an rau cang, nain, an i timhnak hmun an phan kho rih lo.
About The Author
