Hakha GTI Nih Siangnakchia Thar 220 A Cohlan
Salai Cung Cung |2018 October 17| Hakha GTI College nih aralaimi cacawn kum ah Siangngakchia thar minung 220 a cohlan i Form cawk le ap caan cu October 10 in 29 tiang ah a si lai. Sianginn luh caan hi 2018 December 3 in a si lai tiah kan theih.
“Aralaimi cacawn kum ah hin Siangngakchia thar minung 220 kan cohlan hna lai. Cu Siangngakchia 220 chung in Chin ramkulh chung ah tanghra awng hi papek an si lai. Chin ramkulh chung in Tanghra a awngmi hi zatuak 90% cohlan ding le hmundang in a rami zatuak 10% cohlan kan timh. Hakha GTI kai khawhnak dingah hin tanghra awng in Science a lami pawl nih kai khawh a si. Mathematics le English an Mark hi kan zoh i kan cohlan hna. Asinain Siangngakchia minung 220 an tlin lo ah cun tanghra awngmi paoh kha kan zoh than hna lai” tiah Hakha GTI principle Dr. Salai Tluang Za Thang nih The Chinland Post ah a chim.
Tukum Hakha GTI Siangngakchia zapi hi minung 560 an si. Siangngakchia hi camipuai sungh lo in a kai pengmi paoh cu minung pakhat ah thlakhat Ks. 30,000 bawmhnak an pek hna. GTI ah hin Easy Letter Writing zuamnak ah pakhatnak hmumi pawl zong laksawng peknak an ngeih theu hna tiah kan theih.
“GTI Sianginn kum 10 tlinnak hi 2019 January thla hrawng ah tuahding in timhtuahnak kan ngei. Tu tiang ah cun zeihmanh a tlamtling rih lo, asinain program kan ngeihmi cu December thla ah hin cun Sianginn hunka zong a si lai caah January thla hrawng ah hin i tuah kho seh kan ti. Hi kum 10 tlinnak kan tuah tikah Siangngakchia hlun pawl zong an zapi tein kan sawm hna lai. Cun Chin ramkulh Minister pawl zong kan sawm hna lai i sunglawi ngai in kan tuah lai” tiah a bia peh ah a chimchih.
About The Author
