Hakha-Kalay Lampi Remhnak Rian Khulrang In Kan Tuanchuah Lai; CM Salai Lian Luai
TCP-Hakha| 2019 February 4| World Bank tangka cawihmi US $200 million in tuandingmi Hakha-Falam-Kalay pehtlaihnak lampi cu standard ngeite in remh le tuanchuahnak rian khualrang in kan tawlrel lai tiah Chin ramkulh Chief Minister Salai Lian Luai nih a chim.
Hakha-Kalay motor lampi he pehtlai in khualrang in tuanchuahnak caah Chin ramkulh cozah nih a si khawh chung in kan i zuam lai tiah February 4 chun, Carson Hall ah tuahmi hi lam kong ceihmainak ah atu bantuk in Chief Minister Salai Lian Luai nih a chim hi a si.
Hi motor lampi cu World Bank tangka cawihmi US $ 200 million in Lamsul lei ministry zung nih tlangtlak in a tawlrel lai i tender auh in a awngmi nih khulrang in an tuanchuah lai. Hi simanking tuanchuahnak hlan ah kokek pawngkam le zatlang pawngkam pawl a hnorsuanmi a tlawm deuh khawhnak ding ah ahlankan in survey kan tuah lai. Survey tuahnak rian tuanvo a latu ding Cardno in Survey and RAP (social specialist) Daw Tet Tha Myint nih zapi sin ah a chim.
“Hi simanking ah Sagiang ramthen, Kalay in Chin ramkulh Hakha tiang Kalay-Falam-Hakha motor lam khan 124 aum. Kokek pawngkam le zatlang pawngkam kongkau hlathlainak (survey) laaknak caah Kalay-Kumaing in Hakha tiang khan 124 tiang survey tuahdingmi ah kan telh lai i Kumaing in khan 124 tiang lam sersiam remhnak rian an tuan lai. Survey tuahnak rian caah lamcung i a ummi peng pathum in khua 30 ah kal in ningcangte in survey kan tuah lai” tiah a chimchih.
Hi Hakha-Kalay motor lampi standard ngeite in siamremhnak kong ceihmainak ah Chin ramkulh cozah bu in Chief Minister Salai Lian Luai, Hluttaw Speaker Pu Zo Bawi, hluttaw haotu chang U Aung Taan, ramkulh upadi bawizik U Sunny Thang Cung, minister dangdang le ramkulh dirhmun in cozah zung riantuantu pawl, Cardno in Country Director Mr. Retchenm le a phu, Lamsul ministry zung in Chin ramkulh Lamzung in Deputy Director Pu Tha Peng le riantuantu hna pin ah Hakha khuapi chung um zatlang mibu, khuami tampi an i tel.
Hi rian kong ah langhngannak a um khawh nakhnga Cardno hruainak in tonpumhnak ah a rak kaimi zapi he thil sining chimhfiannak le ceihmai zong zanlei suimilam 3:00 tiang an ngei kho tiah kan theih.
Photo: Hakha IRPD
About The Author
