Hakha Town Plan, Super Market Le Khuapi Chung Dinti Peknak Kong An Ceihmai Lai
TCP-Hakha| 2018 November 15| Hakha penguk sipin zung tawlrelnak in a ralaimi November 19, suimilam 10:00am, Hakha Town Hall ah Hakha khuapi Town Plan, super market le Hakha khuapi chung dinti peknak kong ceihmainak an ngei lai tiah kan theih.
Hi kong he pehtlai in Hakha peng NLD party zung in thawngthanhnak lei tuanvo ngeitu Pu T. Biak Kung nih atu bantuk in a chim.
“A ralaimi November 19, suimilam 10:00am in Hakha Town Hall ah Hakha khuapi sersiamnak- town plan, Super market kong le Hakha khuapi chung dinti peknak kong ceihmainak an ngei lai. Hi ceihmainak ah Chin ramkulh hruaitu cozah upa hna, hluttaw upa hna, biaknak upa hna, ramkhel party, khuami vialte sawm dih an si. Ceihmainak lawng si lo in biahalnak le i fianhnak zong a um chih lai. Hakha khuapi chung ah a ummi lawng si lo in Hakha peng chung in khuate lei zong in aho paoh khuaram thanchonak ding khuakhan lairelnak ah zalongte in rak i tel cio dih khawh a si. Khuaram dawtnak lungput he nan rak i tel cio ding zong kan in sawm hna”.
“Hakha khuapi sersiamnak ding le thanchoternak ding ah zatlang mizapi le a kapkip in hruaitu upa hna ruahnak a biapi tuk. Cucaah, hi thawngpang hi cozah lei sawmnak le thawngthanhnak lawng rinh lo in media sin zong in na thanh hrimhrim lai tiah Chin ramkulh hluttaw Speaker zong a si i Chin ramkulh NLD party haotu zong a simi Pu Zo Bawi a ka ti” tiah a biapeh ah a chimchih.
About The Author
