Hakha University Cachimtu An Tlawm Caah Lecturer Pawl Cu Assistant Professor Rian Pek Dingin Lemsoinak An Tuah
Salai Mangpau | July 24, 2023 — Chin ramkulh khualipi Hakha University ah cachimtu Saya/mah riantuantu an tlawn caah Lecturer pawl cu Assistant Professor rian pek dingin lemsoi in rian an auh tiah SAC kuttang um Ministry of Education thanhnak chuah mi in theih a si.
Hakha University ah riantuan ding saya/mah thazang an i daih lo caah Lecturer a si cangmi kum 2 service ngei cangmi nih Assistant Professor rian kaiter an si lai tiah SAC Ministry of Education zung telegram (thilhri in kuatmi ca) in theih a si.
Assistant Professor hmuhnak ah Ph.D class kai hau lo tein Assistant professor rian kai khawh a si nak cu July 21 ni SAC Ministry of Education department nih a chim.
Hakha University
Chin ramkulh caah a hmasa bik Hakha College cu 2016 November 9 ah Kawlram Vice President U Myint Swe hunpiaknak in Chin miphun nih tuanbia thar a tial. 2016 December 8 thawk in sianginn hunnak le kai hram thawk a si. Hakha College ah a hmasa bik in sianguk a tuan hmasatu cu Chin miphun in Pro-Rector Dr. Aye Aye Ngun (Hakha) a si.
Hakha College a rak si lio ah cawn khawhmi major 8 cu; Myanmar, History, Geography, Physics, Chemistry, Mathematics, Botany le Zoology an si.
Hakha College ah Away-tin (Distance Education) kai le camipuai phit khawh a si. Hakha College cu college dirhmun lawng a si rih caah kum hnih tiang lawng an rak kai hnu ah Hakha University a si hnu in Arts & Science major tlin tein cawnkhawh a si hlei ah Computer le Engineer zong cawn khawh a si.
Pro-Pector Dr. Aye Aye Ngun pension a la hnu in nihin tiang Hakha University uktu cu Rector Dr. Lian Za Khup a si.#
About The Author
