Hakha Zatlang Paih Ah Hakha Khuahlun In Bawi Hnin Nih Bual A Co
Zatlang paih bualcotu Bawi Hnin
Tawk Tling Thang| 2019 February 19| Hakha ah tuahmi Chin Miphun Ni zatlang paih cu February 19 chun in an thawk i USA in a rak tlungmi Hakha Khuahlun in Bawi Hnin @Bawi Ciak nih bual a co.
Zatlang paih ah aa paimi zapi hi minung 120 leng an si. Denmark in a rak tlungmi Chuncung pathawng Lian Za Pum a donghnak lei ah a chuak i minung pahnih a tei hna hnu ah Hakha Khuathar in Tluang Zel nih a tei. Tluang Zel cu US in a rak tlungmi Hakha Khuahlun Bawi Hnin nih a chuahhnawh. Bawi Hnin nih Tluang Zel cu a tei i bual a co beh. Laksawng cu thaizing ah an pek te lai tiah kan theih.
Bawi Hnin hi US zong ah aa pai lengmang mi a si. Paih thawng minthang pawl he zong aa paitimi a si. Teinak zong a hmu tawn ve tiah kan theih.
Paih hi suimilam 10:00pm ah ngol ding tiah committee nih an thanh than ruang ah suimilam 10:00 he aa tongmi Bawi Ciak nih teinak a hmuh bak in an ngol. Pathawng aa pai ding tampi an um rih nain aa pai ding pawl buai an i timh lengmang caah an buai sual lai ti phan in tuante ah paih an ngol thannak hi a si tiah paih committee upa sin in kan theih.
Tukum zatlang paih ah tambik a teitu cu Hakha Khuathar in Tha Hlei Cung a si, minung 16 a tei hna. Tambik chang teitu hi Hakha Khuathar thiam in Van Nawl a si, minung 11 a tei hna.
“Tukum Hakha, Chin Miphun Ni Paih Championship laksawng cu Laimi North American Paih Committee nih tangka 1450,000 a kan bawmh. Cun Salai Lung Thli Tum nih tukum lai paih caah Sing 15 kan bawmh ve hna lai a kan ti. Tukum Paih laksawng cu pakhatnak Sing 15 le taisawm, pahnihnak sing 10, Zatlaang paih sing 5, minung tambik teitu sing 2, paih thiambik le aa dawhbik laksawng Sing 2 le Group zuamnak ah pakhatnak sing 3, pahnihnak sing 2, Minung pakhat tei ah upa he ngakchia he 2000 pek an si lai” tiah Rev. Khar Ling nih The Chinland Post a chim.
Hika ah bual a conak Salai Lungthli Tum nih a thlakmi video zoh khawh a si.
February 20, chun suimilam 12:00 in paih an thawk than te lai. Club paih le zuamcawh paih a um than lai. Tuzan zatlang paih tuan i an ngol colhmi ruang ah mi tampi an lungtling lo. Paih committee pawl tanhhlei an ngei tiah a zohtu tampi nih an soisel hna.
About The Author
