Hakha Zophei Youth Fellowship Groups Nih Sing 8 Dih In Lentecelh Zuamnak An Tuah Lai

Salai Cung Cung |2018 October 6| Avoi 1nak Hakha Zophei Youth Fellowship Groups nih October 10 in 12 tiang Hakha ah Pa pumpululh chuih le nu Volleyball zuamnak an tuah lai tiah kan theih.

“Hi avoi 1nak Zophei Youth Fellowship Pa pumpululh chuih le Nu volleyball zuamnak caah hin Australia Zophei Committee (Melbourne Zophei) nih Sing 8 bawmhnak a kan pek i cu tangka in cun tuah kan i timh hi a si. Hi fellowship nih kan i tinh bikmi cu; Hakha ah hin Zohpei hi inn 1000 leng kan um i Hakha hi a kauh tuk caah pakhat le pakhat kan i thei hna lo. Cucaah pakhat le pakhat lungrualnak le hmunkhat te ah riantuan ti khawhnak, cun chiat ni that ni ah hmunkhat te riantuan ti khawhnak ding hi a si. Hakha Zophei Youth Fellowship Groups ti in kan rak dirh hi 2017 July 17 in a si. Cu lio ah cun Chairman ah keimah Salai Za Thawng ka si nain tu lio kan Chairman cu Thawng Tin Lian a si” tiah Salai Za Thawng nih The Chinland Post ah chim.

Hakha Zophei Yoth Fellowship lentecelhnak ah hin phu (Team) khat ah luh man 30,000, cun pakhatnak laksawng hi Pa pumpululh chuih ah 150,000, pahnihnak 70,000 cun Nu volleyball pakhatnak laksawng ah 70,000, pahnihnak ah 50,000 le a thiam bikmi hi anmah le lentecelhnak hmun ah laksawng Roca pek an si lai tiah kan thieh.

“Hakha Zophei Youth Fellowship Groups nih aa tinh bikmi cu chiat ni thatni caah a bik in rian tuan hi a si. Tutan lentecelh i hawikomhnak hi nithum te lawng a si caah a caan a um lo i Zophei dihlak in khuahnih ah teamkhat tiin kan then hna” tiah a chim chap.

Hakha Zophei Fellowship Groups nih tuahmi lentecelhnak ah aa zuam kho dingmi khua hna cu; Pa pumpuluh chuih ah Groups (A) ah Ngalang+Phaikhua, Zephai+Vuangtu, Hriphi, Hmawngtlang+Aibur an si. Groups (B) ah Congthai+Hlamphei, Lawngtlang+Kuhchah, Khuabung+Zabung, Leitak+Tluangram an si tiah kan theih.+++

Na ruahning rak langhter ve.. (Leave a comment)

%d bloggers like this: