HBA Youth Nih March Thla Chung Ah Bible Study le Youth Leadership Training Tuah An Timh
Salai Cung Cung |2019 January 16| Hakha Baptist Association Youth Department tawlrelnak in March thla chung ah Bible study le Youth Leadership training an tuah lai tiah kan theih.
“Hi Bible study cu March thla 1 in 2 tiang tuah a si lai. A hmun hi HBA zung ah kan tuah lai i HBA ramchung mino vialte kan sawm dih hna lai. Cawnpiaktu ding kan saya te cu kawl lei in minung pathum hrawng an ra te lai. Hi Bible study tuahnak ding caah hin Hakha peng Baptist paoh sawmnak ca pek an si lai. Hi Bible study kan tuah hnawhchannak a ruangbik cu kan mino nih hin Bible hi thei u law sih law, kan mino sin lila ah Bible a chim khomi le a cawnpiak khomi si hna seh ti hi kan duh. Hi Bible cawnnak hi biatak tein kan cawn khawh a si ah cun mah le khirhfabu cio ah mino palinga in Bible group ngeih khawh cio u sih ti hi kan saduhthah a si” tiah HBA Youth Department Secretary a simi Pastor Van Tling Thang nih The Chinland Post ah a chim.
“Youth leadership training hi kumthum ah voikhat kan tuah tawnmi asi. Tukum hi Buanlung ah March 28 in 31 tiang kan tuah lai i cawnpiaku ding ah Rev. Dr. Hre Mang a si lai. Hi Youth Leadership training kan tuahnak a ruang cu HBA mino a lamkip in thangcho hna u sih timi saduhthahnak he asi, hmailei zong ah kan pehzulh peng ko lai” tiah a chimchap.
HBA Youth nih thlafatin tuan ding mi program hna cu; Choir cawnnak program, Mino pumnak program le Hakha khuachung le khualeng thianh limhnak rian hi an si. Thianh ding mi pawl cu View Point 1, 2, Thlacamnak tlang, Thlaan, Lamkam hmunthur char ti mi pawl hi thlafatin tein mah le Bu cio nih tuanvo laak peng an si tiah kan theih.
Hakha Baptist Association Youth Department nih 2019 One Year Program hna cu March 1-2 Mino Bible Study training (HBA Zung), March 7-10 Solfa training (Vanha), March 28-31 Youth Leadership Training (Buanlung), April 4-7 Solfa training (Zokhuathar), May 9-12 Solfa training (Halta), May 19 Combine pumh (Zion), June 1 Hakha khuachung Thianhhlimh, June 22-23 Youth Gospel Tour and Fellowship (Town Church to Area and Local Mino sinah), July 1-Aug 2 Youth Music Training (HBA), July 18-21 Solfa training (Lamtuk), August 8-10 Choir Leadership Training Composing (HBA), August 4 Combine pumh (Carson), September 5-8 Solfa training (Hmaikhah) August 26-29 Solfa training (Rinpi), October 17-20 Solfa training (Farrawn), November 17 Mino Combine pumh (Bethel), November 8-10 Solfa training (Bualtak) an si tiah kan theih.
About The Author
