Hihi Kawi Le Lai Kan I Dohnak A Si; Tutan Ah Kan Tei Hna Ahcun Lairam Ah Laimi Nih Kawl Kan Tei Cang Hna Lai
Salai Ngun San Aung| 2018 May 15| Tutan ah ka rian kong ah sual an ka kawl i report an ka tuahmi hi keimah pumpak kong ti nak in Lai mizapi le kan ram ah bawi a tuanmi kawl pawl kan i dohnak a si ti hi kan mizapi nih kan i fian ding a biapi tuk tiah Pu Chan Fiang nih a chim.
“Kei cu Hakha ka phak sin tein an ka rem lonak te te a um pah len. A bik in ka kongah an i ruahpalh tuk mi cu Vice President Pu Henry Van Thio bochan in kan nawl a ngai lo i a duh paoh in a cawlcang tiah an ka ruah. Vice President he hin voikhat zong phon in kan i chawn bal lo. Kei cu thancho nak rian tha a pe mi le mizapi caah din loin ran a tuanmi ka si caah an ka ti bang khan an meeting tu hi cu ka kai a tlawm hrim ko. An meeting paoh cu va kai ning law zei tindah rian ka tuan rua hnga. Chim ka duh mi cu tu tan hi keimah pumpak an ka ti timi nak in kan miphun caah ka cawlcanghmi ruangah a si tikah, Kawl le Lai kan i dohnak a si tiin mizapi nih an hmuhthiam ding a biapi tak tak. Tutan an ka tei i phuah ka si sual ahcun Chinmi kan sung tak tak lai. Kan tei hna asi ahcun hmaikum kawl titoih puai te hna zong ah rian an kan fial ngam ti lai lo. Kan ram ah an duhpaoh in an lawr ngam ti lai lo” tiah Penguk Pu Chan Fiang nih TCP ah a chim.
Chin ramkulh cozah phu (Cabinet) ah ca an tial i cabinet nih April 20 an meeting ah an fehter ning in Pu Chan Fiang cu sualpuhnak 13 an tuah i ca an pek. Pu Chan Fiang nih sual an puhmi pawl cu a tanglei bantuk in pakhat hnu pakhat fianternak a tuah.
“1nak le 12nak- meeting na kai tlawm tuk an ka timi tu cu a dik ko. Rian tuan awk liangluang lak i minister auhmi he htwe oh auhmi he meeting paoh ka kai dih ah zei rian tuan caan dah ka ngeih ti hnga. Kei cu thanchonak rian a papek mi ka si i mizapi lak ah nifatin i cawh in rian a tuan mi ka si. Ramkulh meeting kan kai ahcun cunglei upa pawl nih an i ceih le kannih cu a kilkawi te ah pei kan thut ko cu. Zeihmanh a chuak lomi meeting kai nak cun rian tuan kha ka duh deuh.
(3) Cun Thantlang ah nawl hal loin a kal an ka timi hi an lih a si. Pengkomh uknak zung lutlai, ramkulh uknak zung lutlai le htwe oh mingyi tiang in ka chimh hna hnu ah Tikir ah ka kal mi a si.
(4) Biaknak dang cawlcanghnak ah aa teltum lo tuk an ka ti. Cucu ka minung covo a si. Keimah biaknak hi tha va pe in, va cawlcangh pi len in biaknak dang ah va i tel hlah ning law cu phundang.
(5) Vawlei hmun a mah pumpak nih kautuk a sok an ka timi hi ziah rammi ka si caah vawlei hmun cu ka duh zat paoh sok nak nawl ka ngei lo maw? Ka duh ah ekah 500 zong ka sok ko lai i an ka pek le pek lo tu cu anmah nawl. Cozah zung rian tuan ka si ruangah vawlei hmun sok ka ngah lo maw? Vawlei hmun bel keimah nawl in a thli in va i lak ding law phundang.
(6) Kawl titoin puai Ying lam phu a chuah pi lo an ka timi hi cu ka el mi hna a si ko. Ziah lamphu caah tangka zong an ka chuahpiak tung lo. Rampi cozah nih phungning tein zungkhar a timi ni ah ka zung minung pawl kha lam ter hna ning law zeitin? Ka minung pakhat khat nih hram hram in rian a ka tuan ter (Force Labour) in ka report sehlaw khi hna pawl nih khin an ka dir pi lai lo i ka cei lai cu ta.
(7) Chin Miphun Ni zing tonnak ah a chuak lo an ka timi cu an lih a si. Kei cu a chuakmi pawl ca hmunhma sersiam ding tuanvo pek ka si caah ka rian ka tuan. Chief Minister pawng um le zohkhenh cu ramkulh htwe oh zung pei tuanvo an pek ko hna cu. Hi zingah rian ka tuan a ka hmumi an tam pi.
(8) Vawlei cungpi Nu pawl hi tonnak ah aa tel lo an ka ti. A dik ko, an ka sawm lo cu ta, ziah kaa tel hnga. Kan nu cu an rak sawm ka theih ko kei cu an ka sawmlo. Cun Yangon ah kan ton bal mi cu hi Nu pawl Ni an tuah nak ahhin pa pawl luh ter an rak kan sianh lo. Cu bantuk cu a si ve lai tiah ka hei ruah i kal loin ka um ko.
(9) Upadi nawlngeih (Rule of Law) ah rian a tuan mi a tlawm timi hi cu zeitluk in ka cawlcangh a hngaltu an tam pi. Hakha ka phak ka ah a phu phu sikvelh te hna a rak tam ngai. View point ah keimah pumpak zong in ka kal, cun zarhpi ni ah pelek kha phuthum ah then in humhimnak rian tuanvo ka pek hna. Ka tuanmi an hngalh lo caah a si.
(10) Zung rian ah a thazaang a der an ka ti mi hi an zung le ka zung rak zoh chun hna ulaw nan fiang lai. Cun cunglei upa nih hin voikhat te hmanh ka zung ah ra in an ka chek bal lo.
(11) Hakha Town Hall ah Democracy kong meeting tuah mi thlauh ding tuanvo pek mi rian ah a thazaang der an ka timi hi Town Hall ah silo, CACC ah tuah mi a si. Ramri runvennak Minister nih va thlauh ding in a ka fial i thil sining ka zoh tikah aa ningcang loin ka hmuh. Cucaah CNF in Dr. Sui Khar le Col. Solomon kha ka chimh hna i Dawrthar khuabawi hlun Pu Hrang Kep he Ramri Runvennak minister pa zungkhan bak ah minister pa le CNF kan pale pahnih cu ka ton ter hna. Anmah tein bia an i ruah dih hnu ah an i ceih ning in an tuahmi a si.
(13) Kan zung kulhnak vampang ka hrawh mi hi Lamsul lei Minister Pu Sui Thio nih Htwe Oh cunglei nawlngei he bia an i ruah hnu ah a ka fial i ka tuahmi a si. Kei cu khuachung lam kan tuan hmanh ah zapi hmun le vawlei a hnursuan ding si cun tha tein ka chimh hmasa hna. Hihi Minister Pu Sui Thio nih Cabinet zong ah keimah nih ka fial mi asi tiah ka chim ko ee a ka ti.”
Pu Chan Fiang zong nih hi bantuk in sual an puhnak vialte cu lehnak ca a tial cang nain phung ning tein cunglei ah a pek rih lo caah mizapi sin langhter ding cu amah Pu Chan Fiang nih a duh rih lo.+++
About The Author
