Instagram In Ngakchia A Zuartu Minung Pali An Tlaih Hna
City Hunter | 2018 Tho 12| Social media phunkhat a simi Instagram hmang in ngakchia pawl zuartu an si timi sualpuhnak he Indonesia minung pali cu palek pawl nih an tlaih hna.
Innchungkhar chiat-that Agency pakhat min in Instagram account pakhat nih ngakchia pawl, fapawi hringtu nu hna hmanthlak pawl le Altrosound scan pawl hmanthlak an taar.
Telephone number pakhat a tar chih caah ngakchia cawk a duhtu hna nih whats App in pehtlaih khawh a si tiah palek phu nih an chim.
Cuti ngakchia pakhat cawk a duhtu pehtlaihnak cu a karlak ah an kham khawh nain an zuar cangmi midang ngakchia pakhatnak tlawm lo kan kawl cuahmah rih tiah Palek hna nih an chim.
Ngakchia cawmkeng a duhtu hna nih hi account cu an hmang i whats App in cawkzuarnak an tuah k hawh tiah Indonesia palek bawi chimmi cherhchan in Indonesia Detik media nih an langhter.
Innchungkhar chiat-that agency account hi innchungkhar buainak kan in bawmhchanh lai ti in an taarmi account a si. Hi account a follow tu hi 700 renglo an si i an mithmai fiang lo in ngakchia hna i hmanthlak cu anmah an kum, an umnak, an biaknak tibantuk an sining he an taar hna.
Hi account ah account ngeitu he i pehtlaihnak an i chawnhbiakmi pawl screen shot thlak in an taarmi zong an hmuh. Pakhat nu cu nau thla 7 a pawi cang i cucu a chungkhar nih an theih sual lai ti a phannak kong a chimphuanmi an hmuh.
A dang post pakhat cu fapawi lio nu pakhat hmanthlak le a umnak a dikthliar te in an tialmi an hmuh. Cu hmanthlak tang ah cawmkeng a duhtu hna pehtlaih khawhnak ding telephone number zong aa tial chih.
October 11 ah tuahmi thawngfianternak ah September thla thawk ah tuahtimhmi ngakchia cawkzuarnak pakhat kan kham khawh hnu ah minung 4 kan tlaih cang hna tiah palek nih an chim.
LA tiah langhtermi kum 22 nu pakhat nih a fa thla 11 ngakchia zuar khawh aa zuam tiah palek pawl nih an chim. Cawtu nih dollar 1000 he aa tlukmi Indonesia tangka nuai 15 cu LA kha pek ding a si i puaisa kha nuai 5, Instagram account ngeitu kha nuai hnih le cheu pek ding a si.
Tlaihmi minung pali hi ngakchia cawkzuarnak ah aa telmi an si i ngakchia pawl runvennak upadi buarnak le sualnak hmuh an si ahcun thong kum 15 tiang thlak an si kho tiah palek bawi nih a chim.
Indonesia ahhin a hlan zong ah phungninglo ngakchia cawkzuarnak a rak nain atu bantuk Instagram hmang in cawkzuarnak hi a um lo ti tluk a si i hihi lamthar pakhat a si tiah cozah lei ngakchia runvennak a tuahtu commission nih an chim.
Cun, kumtlinglo pawl sex lei riantuannak caah ngakchia pawl phungninglo in aa cawmkengtu pawl zong a hlan ah Indonesia ah a rak um bal tiah a chimchih.
Ref: BBC Burmese
About The Author
