Japan Ram Ruahsur Le Tilianh Ruang Ah Minung 100 Leng An Thi Cang
TCP-Online| 2018 July 9| Japan ram nitlak thlanglei ah ruah fakpi in a sur i lei a minh ruang ah minung 100 an thih cang pin ah midang 50 hrawng an tlau i chanhchuah a hau harnak tongmi 2000 hrawng an si. Minung nuai 1.6 hrawng nih inn chuahtak in hmundang ah an i thial cang tiah July 9 zingka Japan NHK media nih a thanh.
A hramthawk ahcun minung 11 lawng an thi. July 7 zan tiang ah miinung 50 an thi, July 8 ah minung 84 an thi, July 9 zingka ahcun minung 100 tiang an phan cang. Nikhat hnu nikhat in a thimi an tam chin lengmang.
Cu lawng si lo in minung nuai 3.1 renglo zong inn le lo zamtak in hmun himnak hmun ah i thial ding Japan pawngkam ral i runvennak tawlreltu agency nih an thanh. Asinain, mi cheukhat nih an inn le an lo an chuahtak in an thialtak duh lo.
Hiti ruahsur, tilianh le thlihran ruang ah hlei cung i a kal liomi minung hna a lak chih, tiva ah hnawm a hlonhtu hna zong ti nih a lak chih tibantuk tete in a tlaumi tampi an um.
A tlaumi minung kawl le inn a chuahtakmi hna bawmh dingin cozah nih ralkap minung 50,000 a thlahmi nih an bawmh cuahmah lio a si.
Ruahsur tilianh ruang ah milu nuai 2 renglo a himnak hmun ah i thial ding in cozah nih thawng an thanh hna nain upadi chuah in i thial hrimhrim ding an ti hna lo caah mi tampi nih thial an duh lo, pehzulh in an inn te ah um an duh.
Japan ram ah a fak bikmi ruahsur le pawngkam rawhralnak cu 2014 ah a hnu bik a rak cang. Cu lio ahcun minung 74 an rak thi. Cu lio nakin tutan hi a fak deuh, minung 100 an thi cang.
Ref; The Voice, VOA, NHK
About The Author
