Kalay rawn ah Rokuang Mekazin Chuahmi Tlangzamhnak Tuah

The Chinland Post| 4 November 2019| Chin Funtomnak Bu (CFB) dirhkamhnak le thazang peknak in Kalay rawn ah Rokuang Mekazin (Hakha holh) an chuahmi cu November 3, 2019 Vanbik Memorial Baptist Church(VMBC) ah tlangzamhnak an tuah tiah thawng kan theih.

HI an tuahnak kong he pehtlai in CFB president Pu S Tha Bik nih “ A hlan ah The Chin Times kha Journal in kan rak chuah. Kha bantuk in thawngpang chuah hi kan dirhmun nih a phak deuhlo caah kan holh le ca, kan miphun kilvennak caah tiah Rokuang Mekazin kan chuahnak hi a si. Kan naupa T Van Bawi Lian zuamnak tampi aa tel.” tiah The Chinland Post ah chim.

Rokuang Mekazin hi thlathum dan ah voikhat chuah timh a si. Hi Mekazin tlangzamhnak hi November 3, 2019 VMBC ah tuah a si I khuallian ah Dr. Hmuh Thang zong sawm a si tiah theih a si. +++