Kalaymyo Chaklei Khua Ah SAC Nih Hriamngan In Zing/Zaan A Kah Lengmang
The Chinlandpost | November 2, 2023 — Kalaymyo chaklei an duhnak khua paoh ah November 1 zing/ zaan ah SAC lei nih hriamngan in an kah tiah theih a si.
November 1 zing 11:00am ah SAC nih hramngan 180 MM an kah lengmang i Kalaymyo chaklei khua Nachaung, Mouklin khua lei an kah mi hriamngan ruang ah Mouklin khuami pakhat cawcawng lio hriamngan nih a tlak i, hliamhma a tuar. November 1, zaan 10:30pm tiang ah SAC lei nih hriamngan voi 10 leng an kah. Cun, zaan ah Pyusawhti khua Sedawoo le Aung Min Thar ah hmun a khuar mi SAC ralkap nih meithal an puah len.
Kalaymyo chaklei kalnak lam Duwinchaung thlammual pawng (Thanglui) le Sekyi khua luhnak ah SAC ralkap pawl zanriak in hmun an la. Mah ralhrang pawl nih khualtlawng mi motor lian pakhat ah kyat 50,000 le motor hme kyat 30,000 an hal hna tiah theih a si.
Kalaymyo peng chaklei um Pyusawhti khuakhat ah minung 10 an auh hna i ralram kalduh lo mi nih an mah aiawh in midang kha nihlawh kyat 25,000 pek in ralram an kal ter hna tiah Kalaymyo mipi ralkap sin in theih a si. Kahdohnak an tuahnak caan a sau pah cang, ralhrang thazang an hun der ruang ah atu bantuk in Kalay chaklei Pyusawhti khua pawl raltu ding in an auh hna hi a si.
Tutan ralzaam an tamnak hmunhma, Kalaymyo nitlak chaklei hi Kalay-Tamu, Asia lampi le Pindaw oo, Nanchaung, Letpanchaung, Mouklin, Kalay-Yazagyo lampi le Nansaungpu (နန်းဆောင်းပု) khua, Myaukchawtaw, Chaintakyi khua in tualchung mi hna cu Kalaymyo/Tahan le a him deuhnak hmunhma ah ral an hrial cio hna tiah theih a si.
October thla in November 2 ni tiang ah Kalaymyo thlanglei Sekhan khua ah hmunhma an lak caah Sekhan khua pawngkam Sindaw, Myaung Sung, Nithlak Santa, Kyuang Chaung, Sekhan le Kalaymyo chaklei Nan Chaung khua mipi vialte nih an khua an chuah tak. Cheukhat khua pawl cu SAC ralkap khuachung an luh caan poah ah inn mei an khangh.
Nihin November 2 ni zing tiang ah Kalaymyo chaklei khua le thlanglei khua mipi an thah mi le tlaih mi an tlawm ti lo caah mipi tam deuh Kalaymyo khuachung lei ah a zaam mi hi 50,000 karlak an si tiah theih a si.
Photo/ November 1 SAC hriamngan kahnak ah Mouklin khua mi hliamtuar mi le Kalaymyo ralzaam pawl hmanthlak
About The Author
