Kanpetlet ah mipi 1,500 tluk nih inn le lo an zaamtak
Post staff| 2022 February 24 — Chin ramkulh, Kanpetlet peng, Kyindwe khua lei ah Magway ramṭhen lei in thazang chap dingah a raami ralhrang le Chinland Defense Force (CDF) karlak ah kahdohnak a chuah ruangah Kanpetlet peng Masatwi, Mawchaung, Hlaingdot khua le Htanggone khua hna telh in khua 6 i khuami 1,500 hrawng cu ramtang ah an zaam tiah khuami nih an chim.
Kahdohnak hi February 20 in aa thok i nithum chung a rau tiah CDF-Kanpetlet chungtel pakhat nih RFA ah a chim.
“February 20 ah Laungshay lei in Kyindwe khua ah eidin a rak phormi ralhrang mawtaw 14 in ralhrang thazang 250 tluk aa telmi kha ambush in kan kah hna. Cu kahdohnak ni 3 chungah, khua 6 in mipi 1,500 hrawng cu a pawngkam khua hna ah an zaam” tiah a chim chap.
Nithum chung kahdohnak ah ralhrang lei in 23 an thi nain CDF lei in a hliammi an um lo tiah a ti.
Tu bantuk kahdohnak ruangah, Magway ramṭhen, Laungshay lei in a rak kaimi ralhrang pawl nih hriamngan he hme he kah thlorh in an kah caah a pawngkam khua 6 i khuami hna an zaamnak a ruang cu a si tiah khuami nih an chim.
February 22 zingah Kanpetlet peng Mawchaung khua i mipi inn 4 cu ralhrang nih an khangh lawng si loin Masatwi khua i inn hna cu an thlok dih i thil tampi an lak tiah Kanpetlet khuami nih an chim.
Atu ahcun, ramlak ah a zaami hna hi eidin caah harnak an tong tiah khuami nih an chim.#
About The Author
