Kanpetlet Thimnak Ah Chin Party In CNDP Lawng An I Cuh Than Lai; Pu No Than Kap
Hakha_TCP| 2018 Tho 22| Aralaimi November 3 ah caankarlak thimnak tuahdingmi Kanpetlet peng, Pyithu hluttaw thimfung hmunhma caah CPP (Chin Progressive Party) nih thimnak aa cuhtu ding min an pek cang ko nain ni 10 tluk aa duh ah i cuh than lo ding le CNDP (Chin National Democratic Party) party in aa cuhtu ding Kee Thang Lon thapek cio ding in October 19 ah Central party nih cathanh an chuah.
Hi kong he pehtlai in CPP party in haotu Pu No Than Kap nih atu bantuk in The Chinland Post ah a chim.
“Chin party pathum kan i fonh cang caah siseh, Chin miphun lakah aherh lomi ramkhel i zuamcawhnak le i namnehnak chuahter kan duhlonak caah siseh, Chin mizapi cung ah i thencheunak a chuahtertu hloh le lungrualnak kan duh caah siseh, 2018 October 16, Kanpetlet ah peng dirhmun in party pathum in hruaitu hna thimnak kong ceihmai hnatlaknak an ngeihmi cung ah a ralaimi November 3 thimnak ah kanmah CPP party in thimnak i cuh than lo in CNDP party in Kee Thang Lon dirkamh ding le mee pek ding in kan party central party (CEC) nih October 19 ah cathanh kan chuahnak kha a si”.
“Party pathum kan I fonh cang caah CNDP teinak an hmuh si le Chin party (CNLD) nih teinak kan hmuh a si ko. Cu bantuk in CLD nih teinak an hmuh zong cu thiamthiam. Anmah nih teinak an hmuh kha CPP nih teinak kan hmuh a si ve ko. Chin miphun le Chin party lungrual te in Chin mizapi caah riantuanti caan a za cang” tiah a biapeh ah a chimchih.
Central CPP party (CEC) nih cathanh an chuahmi kong he pehtlai in The Chinland Post nih atu lio party thar CNLD party in Joint General Secretary Salai Ceu Bik Thawng pehtlaihnak kan tuah i atu bantuk in a chim.
“CPP nih Kanpetlet ah thimnak i cuh than lo in CNDP palai Kee Thang Lon dirkamh le mee pek ding biakhiahnak an tuahmi le cathanh an chuahmi cung ah kan i lawm. Upatnak zong kan pek hna. Mah nihhin teinak hmuhnak ding caah tampi a kan bawmh lai. Tutan thimnak cu Chin party nih teinak kan hmuh ko lai ti kan i ruahchan. Hihi Chin party i fonhnak ding khuakhan lairelnak kan thawkka te in kan kalpi le kan rak dirpi pengmi a si. Nihin ahcun party zong kan i fonh kho cang. October 16 ahkhan Chin National League for Democracy (CNLD) tiah party thar dirhnak zong form zong kan va ap cang”.
“October 25 khi central CNDP party upa hna zong Kanpetlet ah kan kal lai i mee lemsoinak kan va tuahpi hna lai. Atu hi party kan i fonh cang caah anmah le peng dirhmun in mee lemsoinak tuah zong a si khawh chung in kan i bawm dih ko hna. Tamu ah CLD (Chin League for Democracy) an i cuh i kan party pathum ning in kan i bawm dih ko. Cu bantuk in Matu le Kanpetlet zong a si ko. Central party cio tu nih hin kan telpi kho hna lo i a si” tiah a biapeh ah a chimchih.
Aralaimi caankarlak thimnak caah Chin party in aa cuhtu ding pathum cu; Tamu peng ah CLD party in U Chit Maung, Matupi peng ah CLD party in Salai Aung Lian, Kanpetlet peng ah CNDP party in Kee Thang Lon an si lai.
Matupi peng ahcun CLD le NLD party pahnih lawng an i cuh lai. Kanpelet peng ahcun CNDP, NLD le USDP party pathum an i cuh lai tiah kan theih.
About The Author
