Kum 1 Ah Rang Tuk In Mawngh Ruang Ah Minung Nuai 1.25 Tluk An Thi; WEF

0

The Chinland Post| 2018 June 24| Vawleicung pumpi tuak in, traffic phunglam zulh lo in motor le seh dangdang rang tuk in mawngh/khalh ruang ah nikhat ah minung 3,400 tluk an thi i, kum khat chung ah a thimi hi minung Nuai 1.25 (million) tluk a phan tiah World Economic Forum nih an hmuhchuahmi an thanh.

Vawleipi Ngandamnak Tuanvolatu (WHO) nih, cu traffic phung zulhlo in a thimi lakah cheuthum cheukhat cu rian rang tuk in mawngh – accident ruang bik a si tiah a thanh.

A thimi lakah a tam bikmi cu mino an si i ram cheukhat nih cucu khenkhamnak ding caah thilthar an chuahpimi tete zong a hung um cang tiah theih a si.

Vawleicung a thangchomi ram lawng ah silo in, kanmah kan ram zong ah kan ton cuahmahmi a si. Chin Ramkulh ah 2018 thawk in thla 4 chung ah Motor le Motorcycle khawndennak In Minung 22 an thi cang tiah theih a si.

Finland ram ahcun, rian rang tuk in motor mawnghmi khenkhamnak ding caah thlahlawh zuhnak phung he pehtlaihnak an tuah.

Day Fine system timi an tuah i, motor mawng pakhat nih nikhat ah rian rang tuk mawngh (speeding) ruang ah dantat aa huahmi a si ahcun, cucu a thlahlawh zuhnak ah hman a si. Rikhiahmi nak in rian rang deuh in mawngh paohpaoh le thlahlawh zuhmi tam deuh ding in phung an ser cu a si.

Cu he pehtlai in, mirum cheukhat an tlaih hna i, datatnak an rak tuahmi hna chung ah Nokia (mobile) director hlun le a dang mirum pakhat an i tel.

2002 lio ah, Nokia director hlun Anssi Vanjoki cu 50km/h in kalnak ding ah 75km/h (suimilam pakhat ah km 50 lawng kalnak ding ah 75) in rian rang tuk in a mawngh ruang ah 116,000 euros ($103,600) an rak liamter bal tiah weforum.org nih a langhter.

Cun, Finland miphun mirum simi Reima Kuisla zong 22km/h in kalnak ding ah 50km/h in a kal ruang ah 54,000 euro ($62,000) an rak liamter bal tiah theih a si.

Hihi vawleicung ah minung a bik in mino thihnak a ruang pakhat simi khenkhamnak ding ah Nokia mobile phone a chuahnak Finland ram nih an tuahmi phung a si.

Finland bantuk in, fakpi dantatnak phung cu Switzerland, UK tbk. zong nih an hun tuah ve.

Rian rang tuk in mawngh ruang ah a thimi hi motor khaltu lawng silo in, motorcycle, cycle (setbing), lamtan lio ah pahmi ke kalmi tbk. zong an i tel tiah WHO nih cun a langhter.

WHO nih rian rang tuk in mawngh ruang i thihlonak (traffic crashes) hi a karh rih lai tiah an ruahdamhnak chungnak an langhter. A ruang cu a thangcho liomi ram tampi ah, motor le motorcycle hmangmi an karh i, a ngeitu an karhnak nih hin a chuahpi lai tiah an ruahdamh cu a si.

Ref: Weforum

About The Author

Na ruahning rak langhter ve.. (Leave a comment)

%d bloggers like this: