Kum 65 Hnu Ah North Korea Hruaitu Kim Jong Un Nih Tuanbia Thar Tialnak In A Hmasa Bik South Korea Vawlei A Lamh

0

City Hunter| 2018 April 27| 1950-53 kum Korea ralpi a chuah hnu ah North Korea ram hruaitu lutlai lakah a hmasa bik South Korea vawlei a laam hmasabikmi cu atu lio North Korea hruaitu Kim Jong Un a si. Atu lio North Korea President Kim Jong Un nih South Korea vawlei a va lamh cu April 27 zingka ah a si.

North Korea ram hruaitu lutlai Kim Jong Un le South Korea ram President Moon Jae-In cu ramri raldaihnak hmun Panumjom ah April 27 zingka ahkhan tuanbia thar tialnak in tonnak an ngei kho.

Kim Jong Un nih South Korea ramri a lamh lio

Kum 10 chung ah a hmasa bik North Korea le South Korea ram hruaitu upa ton biaruahnak an ngeih hi a si. South Korea President Moon Jae-In kha a hlankan in a phan hmasa.

Hiti ramhnih hruaitu upa ton biaruahnak an ngeih lio ah President Kim Jong Un cu ramri lonh i South Korea ram chung lut ding in a sawm. Cu tikah Kim Jong Un cu Moon Jae In nih South Korea ramri in a don. Kim Jong Un nih South Korea ramri vawlei a hun lamh hnu ah Moon Jae In cu Kim Jong Un nih a hruai i North Korea ramri vawlei a hun lamhpi tak ve. Hruaitu an pahnih in mirh ngai le mitmai panh taktak in an i chawn, an kut an i tlai. An pawngkam a ummi vialte kutbeng le lawmhnak (nihnak) thawng in a khat.

Korea ram hruaitu pahnih nih an ke in ramri an i lamhpiak veve lio video a si. 

North Korea ram hruaitu Kim Jong Un hi 1950-53 kar Korea ralpi a thawh hnu in South Korea vawlei a laam hmasa biktu North Korea hruaitu ti in tuanbia thar tialtu a hung si. Korea ralpi a thawh hnu kum 65 hnu ah atu bantuk in North Korea ram hruaitu Kim Jong Un nih South Korea ram vawlei a hmasa bik a lamh hi a si.

South Korea le North Korea hi ui le mee bantuk in aa ralmi an si. Asinain April 27 ahcun North Korea hruaitu Kim Jong Un cu ramri raldaihnak zone hmunhm a simi South Korea ramri chung ah a lut lai ti hi an ruah bakmi a si lo nain a lut. South Korea President Moon Jae In he zong mirh te in an i zoh i an kut an i tlaihmi nih mizapi khuaruah a harter. Thiltha tampi a chuahter hrimhrim lai. Hiti hruaitu pahnih ton biaruahnak an ngeihmi hi Korea ram ca lawng ah si lo in vawleipi ca zong ah thiltha le tuanbia thar taktak a si tiah ramkhel cawlcangtu le ramkip hruaitu upa cheukhat nih an chim cio tiah theih a si.

North Korea hruaitu Kim Jong Un cu June thla thawkka ah American President Donald Trump he zong ton biaruahnak ngei ding in hnatlaknak an ngei cang.
Ref: NBC News, BBC, VOA Burmese

About The Author

Na ruahning rak langhter ve.. (Leave a comment)

%d bloggers like this: