Kutkai, Nam Hpat Kar Ah KIA Nih An Kah Thlak Mi Vanlawng Cu Tuluk Ser FTC 2000G A Si I Vanlawng Mawngtu le A Bawmtu An Thi
The Chinland Post | 2024 January 17 — Shan ram chaklei, Kutkai peng, Nam Hpat Kar khua, Ma-nu-yan hmunhma ah bom a rak thla mi ralkap kahdohnak vanlawng pakhat cu KIA nih an kah thlak i cu vanlawng hi Tuluk ser FTC 2000G a si i a mawngtu Major le a bawmtu Captain hna an thi tiah Khit Thit nih a langhter.
January 16 chun sml 12:00pm hrawng ah cu Tuluk ser FTC 2000G vanlawng nih Nam Hpat Kar bom a rak thlak lio ah an kah hi a si i a mawngtu ralkap Major le a bawmtu Captain an thih hi a si i, cu vanlawng hi zing sml 10:00am hrawng ah bomthlak ding in a chuak tiah a langhter.
“Vanlei ralkap sin in kan theih ṭhan mi cu a tla mi vanlawng hi FTC 2000G a si, khoika in aa thawh ti cu a fiang in theih a si lo nain Namhsam vanlawng tual in aa thawh tiah theih a si. An kah i a tlak caah a mawngtu Major le Captain an thi. An tla ti mi zong kha fehter a si. Cu vanlawng hi vanlawng mawngh cawnnak zong ah an hman bantuk in kahdohnak ca zong ah an hman. A man niam mi vanlawng a si” tiah vanlei ralkap he aa naihniam mi nih Khit Thit ah an chim.
Ralkap nih Tuluk ser FTC 2000G vanlawng 6 a cawk i Namhsam vanlawng tual ah 2022 November ah an phan, Tuluk ser FTC 2000G vanlawng 6 cu 2022 November 22 in November 24 tiang voi 2 ṭhen in Namhsan vanlawng tual ah an phan.
Ralkap Council nih Tuluk ram, Guizhou Aviation Industries Corporation (GAIC) chuah FTC 2000G phun a si i minung 2 nih mawngh a ngah mi vanlawng 6 a cah i Tuluk ram Yunnan peng, Xishuangbanna Gasa vanlawng tual in Namhsan vanlawng tual ah 2022 November 22-24 tiang ah vanlawng 3 phukhat in voi 2 an rak phan. Tuluk ser FTC 2000G vanlawng pakhat ah USD $ 8 Million hrawng a si tiah Khit Thit sin in thawng theih a si.
About The Author
