Lai Ram Ceu Nih Zatlang Paih Bualco Laksawng A Hmuhmi CNA A Hlut

Tawk Tling Thang| 2019 February 17| Perth Western, Australia, tukum Chin Miphun Ni Zatlang le zuamcawh paih ah bual a cotu Lai Ram Ceu Nih laksawng a comi zohta lo, dengteo in Camp Victoria ah a ummi CNA (Chin National Army) a hlut hna kan theih.

February 16 ah tuahmi Perth Western, Australia i Chin Miphun Ni zatlang paih le zuamcawh paih ah Hakha Khuahlun in Lai Ram Ceu nih bual a co. CNA ah a hlutmi tangka hi Zatlang paih bualco laksawng in a hmuhmi $700 a si.

Hi kong he pehtlai in Lai Ram Ceu nih, “A si, zatlang paih bualco laksawng ka hmuhmi $700 kha Camp Victoria ah a ummi CNA pawl ka hlut hna. Zatlang kaa paihka te hrimhrim in laksawng ka hmuhmi cu CNA ka hlut hna lai tiah biakhiahnak kaa tuah cia cangmi a si. Cu ruang ah laksawng a kan pek cangka cabawm zoh le kauta ti lo in hika ah a ummi CNF committee upa ka pek colh hna. Miphun le ram caah rian a tuantu le dothlennak a tuahtu hna caah chimtlak lo ka ti khawh tawk te ka bawmh hna khi a si” tiah The Chinland Post ah a chim.

Lai Ram Ceu nih zatlang paih bualco laksawng ah $ 700 le zuamcawh paih champion laksawng ah $1500 a co. Lai Ram Ceu hi tukum mi a tei hna ning zoh tikah a paih aa dawh tuk, zaangdamte in a tei hna.

Tukum zuamcawh paih final aa paih lai te ah paih tawlreltu upa nih biahalnak a tuah hna lio ah hitihin a chim.
“Zuamcawh paih ah champion ka co hrimhrim lai ti kaa zumhcia, champion cu keimah ta asi ko lai. Hi champion taisawm nak in ka duh deuhmi cu paih a thancho chinnak ding ah USA i paih tuah dingmi ah i tel khawhnak ding vanlawng ticket cawkpiak hi a si” tiah a chim. A chim bantuk te in champion cu a co taktak.

Hika ah Perth Western, Australia paih zuamnak le bual a conak video zoh khawh a si. 

Amah hi Malaysia a um lio 2010 le 2011 kum ah kumhnih pehte in paih dawh bik laksawng an rak pek bal cang. 2011 kum hoihna cu club ah bual zong a rak co beh. Amah hi Hakha Khuahlun Pi Za Hit fapa a si. Hakha ah a ummi a upa Van Chan Ceu zong hi paih a thiammi le champion a co bal vemi a si.

Lai Ram Ceu hi tukum zatlang le zuamcawh he bual a co ruang ah a ralaimi June 29, USA ah World Paih Championship (@ Pu Ang Cung te phu) nih a tuahdingmi paih zuamnak ah i tel ding in an sawm cia cang. WPC nih vanlawng ticket an cawkpiak te lai tiah kan theih.
Photo: Chin National Day, Perth Western Australia

Na ruahning rak langhter ve.. (Leave a comment)

%d bloggers like this: