Minbya Ah A Hnu Bik A Tang Mi Ralkap Sakhaan AA Nih An Kah Cuahmah
The Chinland Post | 2014 January 30 — Rakhine ram, Minbya hrambunh IB pathum chung ah a hnu bik a tang mi IB 379 cu AA nih a kah cuahmah lio tiah unau hawikom phu 3 nih January 29 ah thawng an thanh.
Minbya ah a um mi ralkap sakhaan 3 chung ah IB 380 cu January 29 ah siseh, IB 541 cu January 30 ah AA nih an lak khawh.
Minya ah ralkap No. 9 Training School zong a um. A sianginn zong AA nih a luancia 2020 March ah an rak lak cang.
Sakhaan pawl a sung thluahmah mi ralkap lei nih kahdohnak tilawng pawl, hriamngan pawl an kah len i kahdohnak vanlawng zong in voi tampi bom a thlak, a phir phir in kah mi Missile pawl zong hmang in a sakhaan pawl ven aa zuam tiah AA nih an thanh.
Mrauk U ah a um mi ralkap sakhaan pawl zong AA nih a kah thluahmah. Myoma palek sakhaan, Thu-daw-ma-kone sakhaan, Tin-gyit-tlang sakhaan, Lin-mwe tlang sakhaan le Myaung-bwe palek sakhaan hna AA nih a tlaih cang. IB 540, 377, 378 le palek battalion 31 hna zong a kah thluahmah tiah Rakhine ram thawngzamh pawl nih an langhter.
Cubantuk in kahdohnak a fak cuahmah mi Rakhine ram ah kahdaihnak tuah ding in Tuluk nih ralkap council he biaruahnak a ngei tiah Bangladesh he pehtlai in Tuluk Ambassador Yao Wen nih January 28 ah a chim.
“Rakhine ram chung kahdaihnak caah Tuluk nih a karlak in a tawlrel piak hna” tiah Bangladesh ramdang lei Minister Dr. Hasan Mahmud he tonnak an ngeih hnu Press Conference ah a chim tiah Bangladesh thawngzamh BSS nih a langhter.
Tuluk Ambassador Yao Wen le Bangladesh ramdang lei Minister Dr. Hasan Mahmud he tonnak ah Rohingya pawl Myanmar ram kuat ṭhan ding zong kan i zuam lai tiah Yao Wen nih a chim.
About The Author
